സ്വാമീ…. ചിരിപ്പിച്ച് കൊല്ലരുത്… പശുവില്‍ പ്രബന്ധമവതരിപ്പിച്ച് ഉദിത് ചൈതന്യ, കണ്ടെത്തലുകള്‍ ശാസ്ത്രലോകത്തിനു മുതല്‍ക്കൂട്ടാകും

ക്യാന്‍സര്‍ മാറ്റാന്‍ ഗോമൂത്രത്തിന് സാധിക്കും. ചാണകത്തില്‍ റേഡിയോ ആക്ടീവായ പ്ലൂട്ടോണിയമുണ്ട്.അത്ഭുത കണ്ടെത്തലുമായി ഭാഗവതാചാര്യന്‍ സ്വാമി ഉദിത് ചൈതന്യ. ‘ഗോവധ നിരോധനവും പശുവിന്റെ ഗുണങ്ങളും’ എന്ന വിഷയത്തില്‍ നടത്തിയ പ്രഭാഷണത്തിലാണ് സ്വാമിജിയുടെ കണ്ടെത്തല്‍ അവതരിപ്പിച്ചത്.

പശുവുണ്ടെങ്കില്‍ നമുക്ക് ജീവിതത്തെ അപ്പാടെ മാറ്റിമറിക്കാന്‍ പറ്റും എന്ന് അവകാശവാദമുന്നയിച്ചാണ് അദ്ദേഹം പശുവിന്റെ ‘ഗുണങ്ങള്‍’ വിവരിക്കുന്നത്. നേരത്തെ സോഷ്യല്‍ മീഡിയകളില്‍ സഞ്ജീവനി എന്ന ട്രോള്‍ പേജ് പുറത്തുവിട്ട വീഡിയോയിലെ ട്രോളുകള്‍ ആധികാരികമായ ഗവേഷണങ്ങള്‍ എന്ന രീതിയിലാണ് അദ്ദേഹം അവതരിപ്പിക്കുന്നത്.

കൊമ്പ്

നാടന്‍ പശുക്കളുടെ കൊമ്പുകള്‍ക്ക് ഒരു പ്രത്യേകതയുണ്ട്. അതിന് ഏറ്റവും കൂടുതല്‍ റേഡിയോ ആക്ടിവിറ്റി അബ്‌സോര്‍ബ് ചെയ്യാനുള്ള കഴിവുണ്ട്. ഒരു എഫ്.എം റേഡിയോ ഓണാക്കിയിട്ട് പശുവിന്റെ കൊമ്പിന്റെ ഇടയില്‍ വെച്ചുകഴിഞ്ഞാല്‍ പ്രോഗ്രാം നിങ്ങള്‍ കേള്‍ക്കില്ല. പകരം ഓം എന്നുള്ള ശബ്ദം മാത്രമാണ് കേള്‍ക്കുക. അത്രയും ആ ശബ്ദ തരംഗങ്ങളെ നിയന്ത്രിച്ച് മൂളക്കം മാത്രമാക്കിയെടുക്കാന്‍ പശുവിന്റെ കൊമ്പിന് കഴിവുണ്ട്. അന്തരീക്ഷത്തില്‍ നമുക്ക് ഹാനികരമായ പല കാന്തിക തരംഗങ്ങളെയും മാറ്റാനുള്ള കഴിവുണ്ട്. ഇങ്ങനെയൊക്കെയാണ് സ്വാമിയുടെ കണ്ടെത്തല്‍.

ചാണകം

ഒരു വിലയും ഇല്ലാത്ത സാധനായിട്ടാണ് ചാണകത്തെ ഇപ്പോള്‍ സര്‍ക്കാര് കാണുന്നത്. എന്നാല്‍ ഇന്ന് നമുക്ക് അട്ടോമിക്ക് പവര്‍ സ്റ്റേഷനിലേക്ക് വേണ്ടുന്ന പ്ലൂട്ടോണിയം നിങ്ങക്കറിയ്വോ.., ഏറ്റവും അധികം ഈ ആറ്റങ്ങള്‍ വിഘടിപ്പിക്കാന്‍ വേണ്ടുന്ന സാധനാ അത് ഇാ ചാണകത്തില്‍ ഉണ്ട് ന്നാ പറയണത്. സ്വാമി വാചാലനാകുന്നു.

മൂത്രം

ഗോമൂത്രത്തിന് ക്യാന്‍സര്‍ ഭേദമാക്കാന്‍ കഴിയുമെന്ന വാദമുറമാണ് അദ്ദേഹം അവതരിപ്പിക്കുന്നത്. തന്റെ സുഹൃത്തിന്റെ രോഗം ഭേദമായിട്ടുണ്ടെന്നും സ്വാമി അവകാശപ്പെടുന്നുണ്ട്.
ഗോമൂത്രം കുടിച്ച് സ്വാമിക്ക് ആസ്തമ മാറി. എന്റെ ഒരു സുഹൃത്ത് ജയിംസ് അദ്ദേഹം ക്രിസ്ത്യാനിയാണ്. അദ്ദേഹം ബ്ലഡ് ക്യാന്‍സറാണ്. അദ്ദേഹം ഗോമൂത്രം കഴിച്ച് അത് ഭേദമായി എനിക്കത് ആധികാരികമായി പറയാന്‍ കഴിയും. ‘

പശുവിനെക്കുറിച്ചു മാത്രമല്ല പാമ്പിനെക്കുറിച്ചും അദ്ദേഹം ചില കണ്ടെത്തലുകള്‍ അവതരിപ്പിക്കുന്നുണ്ട്. പാമ്പിന് അന്തരീക്ഷത്തിലെ വിഷാംശം വലിച്ചെടുക്കാനുള്ള കഴിവുണ്ട്. പാമ്പ് നിശ്വസിക്കുന്ന വായുകൊണ്ട് അന്തരീക്ഷത്തിലുള്ള വിഷാംശങ്ങളും ബാക്ടീരികളുമെല്ലാം നശിക്കുമെന്നും കണ്ടെത്തലിലുണ്ട്.

ഇനി ഈ വീഡിയോ കൂടി കാണണം