‘നിങ്ങളുടെ കൂവലുകളില്‍ തകരുന്നത് എന്റെ ഹൃദയമാണ്’; ദയവ് ചെയ്ത് ‘സോളോ’യെ കൊല്ലരുതെന്ന അഭ്യര്‍ത്ഥനയുമായി ദുല്‍ഖര്‍ സല്‍മാന്‍

തന്റെ പുതിയ ചിത്രമായ ‘സോളോ’-യെ ഡീഗ്രേഡ് ചെയ്യരുതെന്ന അഭ്യര്‍ത്ഥനയുമായി ദുല്‍ഖര്‍സല്‍മാന്‍. തന്റെ ഫെയ്സ്ബുക്ക് പേജിലൂടെയാണ് ദുല്‍ഖര്‍ അഭ്യര്‍ത്ഥന നടത്തിയിരിക്കുന്നത്. കൂവിയും ഡീഗ്രേഡ് ചെയ്തും തന്റെ ഏറ്റവും പുതിയ ചിത്രമായ ‘സോളോ’യെ കൊല്ലരുതെന്നാണ് ദുല്‍ഖര്‍, ആരാധകരോട് അപേക്ഷിച്ചിരിക്കുന്നത്.

‘തന്റെ സ്വപ്നസമാനമായ ചിത്രമാണ് സോളോ. ആ ചിത്രത്തിനായി തന്റെ ആത്മാവും ഹൃദയവും നല്‍കി. ചോര നീരാക്കിയാണ് ഞങ്ങള്‍ വളരെ ചെറിയ ഒരു ബജറ്റില്‍ ആ ചിത്രം പൂര്‍ത്തിയാക്കിയത്. എന്തിനുവേണ്ടിയാണ് സോളോ ചെയ്തതെന്നും ആ ചിത്രം ഒഴിവാക്കാമായിരുന്നില്ലേയെന്നും പലരും തന്നോട് ചോദിക്കുന്നുണ്ട്. വാര്‍ത്താ ലേഖനങ്ങളായാലും കണ്ടുമുട്ടുന്ന ആളുകളായാലും കാണുന്ന സിനിമകളായാലും വായിക്കുന്ന പുസ്തങ്ങളായാലും അതില്‍ നിന്നെല്ലാം കഥകള്‍ തെരയുന്ന ആളാണ് താന്‍. വ്യത്യസ്തയും പരീക്ഷണവുമാണ് താന്‍ന്‍ ഏറെ ഇഷ്ടപ്പെടുന്നത്. 

ഏതു കഥയും പറയാന്‍ തക്ക ധൈര്യം എന്റെ എല്ലാ പ്രേക്ഷകരും എല്ലായ്‌പ്പോളും നല്‍കുമെന്നാണ് താന്‍ കരുതിയിരുന്നത്. എന്നാല്‍ ഒരുപാടിഷ്ടത്തോടെ ചെയ്ത സോളോയിലെ രുദ്ര എന്ന തന്റെ കഥാപത്രത്തേയും കഥയെയും പരിഹസിക്കുകയും കൂവുകയും ചെയുമ്പോള്‍ തങ്ങളുടെ എല്ലാവരുടെയും ഹൃദയം തകരുകയാണ്. മാത്രമല്ല അത് തങ്ങളുടെ വീര്യത്തെകൂടിയാണ് നശിപ്പിക്കുന്നത്. അതുകൊണ്ട് നിങ്ങളോട് യാചിക്കുന്നു… സോളോയെ കൊല്ലരുത്’ – ദുല്‍ഖര്‍ തന്റെ ഫേസ്ബുക്കില്‍ കുറിച്ചു.

തിയേറ്ററില്‍ പ്രദര്‍ശനം തുടരുന്ന ഈ ചിത്രത്തില്‍ ചില മാറ്റങ്ങള്‍ വരുത്തിയിട്ടുണ്ട്. അക്കാര്യത്തില്‍ താന്‍ സംവിധായകന്‍ ബിജോയ് നമ്പ്യാരുടെ കൂടെയാണെന്നും ദുല്‍ഖര്‍ വ്യക്തമാക്കി. ചിത്രത്തിന്റെ നിര്‍മ്മാണത്തിലോ മറ്റോ പങ്കാളികളാകാത്തവര്‍ അത് മുറിച്ചുമാറ്റുന്നതും കൂട്ടിക്കുഴയ്ക്കുന്നതുമുള്‍പെടെ ചെയ്യുന്നതെല്ലാം ചിത്രത്തെ ഇല്ലാതാക്കാന്‍ മാത്രമേ സഹായിക്കൂവെന്നും പോസ്റ്റില്‍ ദുല്‍ഖര്‍ കൂട്ടിച്ചേര്‍ത്തു.