ആ ഘട്ടത്തില്‍ സൂചന ഇല്ലാത്തതിനാലാണ് മുഖ്യമന്ത്രി അങ്ങനെ പറഞ്ഞത്; കേസില്‍ ഗൂഢാലോചനയില്ലെന്ന മുഖ്യമന്ത്രിയുെട വാദത്തിന് കോടിയേരിയുടെ ന്യായീകരണം
കൊച്ചിയില്‍ നടി ആക്രമിക്കപ്പെട്ട കേസില്‍ ഗൂഢാലോചനയില്ലെന്ന മുഖ്യമന്ത്രിയുടെ നിലപാട് പ്രഥമവിവരങ്ങളുടെ അടിസ്ഥാനത്തിലാണെന്ന് സി.പി.എം. സംസ്ഥാന സെക്രട്ടറി കോടിയേരി ബാലകൃഷ്ണന്‍.എന്നാല്‍ പുതിയ വിവരങ്ങളുടെ അടിസ്ഥാനത്തിലാണ് ഇപ്പോഴത്തെ അന്വേഷണം. കേസില്‍ പെട്ടയാളെ എത്രനേരം ചോദ്യം ചെയ്യണമെന്നത് പോലീസാണ് തീരുമാനിക്കുക. ഗൂഢാലോചനയില്ലെന്ന് പറഞ്ഞത് ആ ഘട്ടത്തില്‍ സൂചനയില്ലാത്തതിനാലാണെന്നും കോടിയേരി പറഞ്ഞു.
കൊച്ചിയില്‍ നടി ആക്രമിക്കപ്പെട്ട സംഭവത്തില്‍ പൂര്‍ണ ഉത്തരവാദിത്തം പ്രധാനപ്രതിക്കാണെന്നു ഗൂഢാലോചനയില്ലെന്നും മുഖ്യമന്ത്രി പറഞ്ഞിരുന്നു. തലശേരിയില്‍ നടന്ന പൊതുപരിപാടിയില്‍ വെച്ചായിരുന്നു മുഖ്യമന്ത്രിയുടെ പരാമര്‍ശം.
മുഖ്യമന്ത്രിയുടെ വാക്കുകളില്‍ നിന്ന്
പ്രധാന പ്രതിയുടെ തന്നെ ഭാവനയാണിത്. പ്രധാന പ്രതിയുടെ ഭാവനയ്ക്ക് അനുസരിച്ച് നടത്തിയ ഒരു നടപടിയാണിത്. അയാളുടെ മനസ്സില്‍ ഉയര്‍ന്നുവന്ന ഒരു സങ്കല്‍പ്പം. ഒരു കുറ്റകൃത്യം എങ്ങനെ നടത്തണമെന്ന് കുറ്റവാളി സങ്കല്‍പിച്ച് വെക്കുമല്ലോ. അതിന്റെ ഭാഗമായി നടത്തിയ കാര്യം. ഇതാണ് ഇവിടെ സംഭവിച്ചിട്ടുള്ളത്. ഒരു നടനെപ്പറ്റി ആരോപണം വന്നു. ആ നടന്റെ പിന്നാലെ പോലീസ് ഉണ്ട്. ആ നടന്റെ വീട്ടില്‍ പോലീസ് എത്തി. ചോദ്യം ചെയ്തു. എല്ലാം നുണകളാണ്. സിനിമാ ലോകവുമായി ബന്ധപ്പെട്ട് അനാവശ്യമായ ഒരു ചിത്രം സൃഷ്ടിക്കാന്‍ എന്തിനാണ് ഒരു ശ്രമം നടന്നത്. നിയമത്തിന്റെ കരങ്ങളില്‍ കുറ്റവാളികള്‍ എത്തുന്നതിന് ആരും തടസ്സം നില്‍ക്കന്‍ പാടില്ല.
കേസില്‍ മുഖ്യപ്രതി പള്‍സര്‍ സുനിയുടെ ചോദ്യം ചെയ്യല്‍ പോലും പൂര്‍ത്തിയാകുന്നതിന് മുന്‍പായിരുന്നു മുഖ്യമന്ത്രിയുടെ പ്രസ്താനവ. ഇതിനെതിരെ വ്യാപക വിമര്‍ശനം ഉയര്‍ന്നപ്പോള്‍ ഗൂഢാലോചന ഇല്ലെന്ന് താന്‍ പറഞ്ഞിട്ടില്ലെന്ന വിശദീകരണവുമായി മുഖ്യമന്ത്രി രംഗത്തെത്തിയിരുന്നു.
