വേഗതയുടെ രാജാവിന് വേദനയോടെ മടക്കം ; വിടവാങ്ങല്‍ മത്സരത്തില്‍ കുഴഞ്ഞ് വീണ് ഉസൈന്‍ ബോള്‍ട്ട്
ലണ്ടന്‍: വിടവാങ്ങല്‍ മത്സരത്തില്‍ മൂന്നാം സ്ഥാനം കൊണ്ട് തൃപ്തിപ്പെടെണ്ടി വന്ന വേഗതയുടെ രാജാവായ ഉസൈന്‍ ബോള്‍ട്ടിന് തന്‍റെ അവസാന മത്സരത്തില്‍ വേദനയോടെ മടക്കം. ലോക അത്‌ലറ്റിക് ചാമ്പ്യന്‍ഷിപ്പിലെ 4×100 മീറ്റര്‍ റിലെയില്‍ അവസാന ലാപ്പിലോടിയ ഉസൈന്‍ ബോള്‍ട്ട് മത്സരം പൂര്‍ത്തിയാക്കാനാവാതെ ട്രാക്കില്‍ കുഴഞ്ഞുവീണു. പേശിവലിവിനെത്തുടര്‍ന്നാണ് ബോള്‍ട്ട് പിന്നാക്കം പോയത്. അമേരിക്ക വെള്ളിയും ജപ്പാന്‍ വെങ്കലവും സ്വന്തമാക്കി. അവസാന മത്സരങ്ങള്‍ക്കു ഇറങ്ങിയ ഉസൈന്‍ ബോള്‍ട്ടിന് ലോക ചാമ്പ്യന്‍ഷിപ്പില്‍ നിന്നും ആകെ നേടാനായത് 100 മീറ്ററില്‍ ലഭിച്ച വെങ്കലം മാത്രമാണ്.
മത്സരം ആരംഭിച്ച് അവസാന ലാപ്പില്‍ ബോള്‍ട്ടിന് ബാറ്റണ്‍ ലഭിക്കുമ്പോള്‍ ജമൈക്കന്‍ ടീം മൂന്നാം സ്ഥാനത്തായിരുന്നു. ബ്രിട്ടനും അമേരിക്കയുമായിരുന്നു മുന്‍നിരയിലുണ്ടായിരുന്നത്. ബാറ്റണുമായി അല്‍പദൂരം സഞ്ചരിച്ചതോടെ പേശിവേദനയെത്തുടര്‍ന്ന് നിസഹായനായി ബോള്‍ട്ട് ട്രാക്കിലേക്ക് വീഴുകയായിരുന്നു. സെമി ഫൈനലില്‍ ഹീറ്റ്‌സില്‍ അവസാന ലാപ്പ് ഓടിയ ബോള്‍ട്ട് ടീമിനെ സ്വതസിദ്ധമായ ശൈലിയില്‍ ഓടി വിജയത്തിലെത്തിച്ചിരുന്നു. ആതിഥേയരായ ബ്രിട്ടനാണ് സ്വര്‍ണം. 37.47 സെക്കന്റിലാണ് ബ്രിട്ടന്റെ ഈ നേട്ടം.
