ശോക മൂകമായി ആര്‍ എസ് എസ് , ബി ജെ പി കേരളാ ഘടകം ; മന്ത്രി സ്ഥാനം കിട്ടിയിട്ടും ഒരിടത്തും ആഘോഷമില്ല
തിരുവനന്തപുരം : കേന്ദ്ര മന്ത്രിസ്ഥാനം സ്വപ്നംകണ്ട് അതിനുള്ള കുപ്പായം ഒരുക്കി കാത്തിരുന്ന ആര്‍ എസ് എസ് , ബി ജെ പി കേരളാ നേതാക്കള്‍ ഞെട്ടലില്‍ നിന്നും ഇനിയും മുക്തമായില്ല എന്ന് തോന്നുന്നു. കാരണം കാത്തുകാത്തിരുന്നു ഒരു മന്ത്രി സ്ഥാനം ലഭിച്ചിട്ടും മരണ വീട് പോലെയാണ് കേരളത്തിലെ ആര്‍ എസ് എസ് , ബി ജെ പി പാര്‍ട്ടി ഓഫീസുകള്‍.ഓണമായിട്ടുപോലും ഒരിടത്തും വെട്ടവും വെളിച്ചവും ഇല്ലാത്ത അവസ്ഥ. അല്‍ഫോണ്‍സ് കണ്ണന്താനം കേന്ദ്ര മന്ത്രിയായി സത്യപ്രതിജ്ഞ ചെയ്യുമ്പോള്‍ സംസ്ഥാനത്തെ ബി.ജെ.പി ആസ്ഥാനത്ത് ആരവങ്ങളോ ആഘോഷങ്ങളോ ഇല്ല. കേരളത്തിനുള്ള ഓണസമ്മാനമാണ് കണ്ണന്താനത്തിന്റെ മന്ത്രി പദവിയെന്നാണ് കുമ്മനത്തിന്റെ പ്രസ്താവന. പക്ഷെ ഓണവും മന്ത്രിസ്ഥാനവും ഒരുമിച്ചെത്തിയിട്ടും കണ്ണന്താനത്തിന്റെ ജന്മനാടായ മണമലയിലൊഴികെ സംസ്ഥാനത്ത് മറ്റെവിടെയും കാര്യമായ ആഹ്ലാദ പ്രകടനങ്ങളുണ്ടായില്ല.
പാര്‍ട്ടി സംസ്ഥാന ആസ്ഥാനത്തെ സന്ദര്‍ശകര്‍ക്കുള്ള മുറിയിലെ ടി.വി ഓണാണെങ്കിലും ദൃശ്യങ്ങളൊന്നും കാണുന്നില്ല. കുമ്മനത്തിന്റേതടക്കമുള്ള പേരുകള്‍ ആര്‍.എസ്.എസ് മുന്നോട്ട് വെച്ചിരുന്നു. സംസ്ഥാന നേതാക്കളോടും ആര്‍.എസ്.എസിനോടും ഒന്നും ആലോചിക്കാതെയാണ് തീരുമാനം വന്നത്. തമ്മിലടിയും മെഡിക്കല്‍ കോഴ വിവാദങ്ങളുമൊക്കെ പലരുടേയും സാധ്യതകള്‍ ഇല്ലാതാക്കി. ക്രൈസ്തവ സഭയുമായി അടുത്ത ബന്ധമുള്ള അല്‍ഫോന്‍സ് കണ്ണന്താനം വഴി കേരളത്തില്‍ ക്രൈസ്തവര്‍ക്കിടയിലും താമരയുടെ വളര്‍ച്ചക്കുള്ള സാധ്യതകള്‍ തേടുകയാണ് മോദിയും അമിത്ഷായും. നേതൃത്വത്തെ തഴഞ്ഞുള്ള മന്ത്രിസ്ഥാനത്തിന് പിന്നാലെ സംഘടനയിലും ഇനി സര്‍ജിക്കല്‍ സ്‌ട്രൈക്ക് ഉണ്ടാകുമോ എന്ന ആശങ്കയും സംസ്ഥാന നേതാക്കള്‍ക്കുണ്ട്. ബി.ജെ.പി സംസ്ഥാന നേതാക്കളെയും ആര്‍.എസ്.എസ്സിനെയും പൂര്‍ണ്ണമായും കേന്ദ്രം ഒരിക്കല്‍ കൂടി തഴയുകയായിരുന്നു.
ഓണാവധിയല്ലേ… അപ്രതീക്ഷിത തീരുമാനമല്ലേ… അതാണ് ലഡ്ഡുവും പ്രകടനങ്ങളും ഇല്ലാത്തതെന്ന് ഒരു ജില്ലാ നേതാവ് അനൗദ്യോഗികമായി പറയുന്നു. കേന്ദ്രത്തില്‍ നിന്നുള്ള അപ്രതീക്ഷിത നീക്കത്തിന്റെ ആഘാതത്തില്‍ നിന്നും സംസ്ഥാന നേതൃത്വം കരകയറിയില്ല എന്ന് വ്യക്തം.
