ടാറ്റു പ്രേമം മൂത്താല്‍ ഇങ്ങനെയുമുണ്ടോ; കണ്ണിനകത്ത് പച്ചകുത്തി ഇന്ത്യന്‍ യുവാവ്, ചിത്രങ്ങള്‍ വൈറല്‍
ന്യൂഡല്‍ഹി: ശരിരത്തില്‍ ടാറ്റു ചെയ്യുക എന്നത് ഇന്ന് ലോകത്ത് അതിവേഗം വളരുന്ന ഒരു ഫാഷനായി മാറിയിരിക്കുകയാണ്. ആളുകളുടെ ശ്രദ്ധ പിടിച്ചു പറ്റാന്‍ വിവിധ രൂപത്തിലും വ്യത്യസ്ത രീതിയിലുമാണ് ഭൂരിഭാഗം ടാറ്റു പ്രേമികളും ടാറ്റു ചെയ്യുന്നത്. ശ്രദ്ധ ലഭിക്കാന്‍ മുഖത്തും കണ്‍പോളകളിലും നാവിനാകാത്തതൊക്കെ ടാറ്റു ചെയ്യുന്നവരുമുണ്ട്. എന്തിനേറെ പറയുന്നു ശരീരത്തില്‍ ടാറ്റു പതിച്ച് ഗിന്നസ് ബുക്കില്‍ കയറിപ്പറ്റിയവര്‍ പോലുമുണ്ട്.
എന്നാല്‍ ടാറ്റു കമ്പം കാരണം കണ്ണിനകത്തും പച്ചകുത്തിയാലോ . ലോക രാജ്യങ്ങളില്‍ പുതിയ ട്രന്‍ഡായി വരുന്ന ടാറ്റു രംഗത്തെ പുത്തന്‍ ആശയമാണിത്.കണ്ണിനുള്ളില്‍ ടാറ്റു പതിപ്പിക്കുക എന്നത് വളരെ ശ്രമകരമായ കാര്യമാണ് പോരാത്തതിന് ചിലപ്പോള്‍ കണ്ണിന്റെ കാഴ്ച വരെ നഷ്ടമാവുകയും ചെയ്യാം. എന്നാല്‍ ഇതൊന്നും വകവെക്കാതെ ടാറ്റു പ്രേമം തലയ്ക്കു പിടിച്ച ഒരു ഇന്ത്യന്‍ യുവാവ് തന്റെ കണ്ണിനകത്ത് പച്ച കുത്തിയിരിക്കുകയാണ്.
ഡല്‍ഹി സ്വദേശിയായ കരണ്‍ എന്ന യുവാവാണ് കണ്ണിനകത്ത് പച്ചകുത്തിയത്. 28കാരനായ കരണ്‍ പറയുന്നത് തന്റെ ശരീരത്തില്‍ ഇപ്പോള്‍ എത്ര ടാറ്റു ഉണ്ടെന്ന് അറിയില്ലെന്നാണ്. നേത്രഗോളത്തിലേക്ക് നിറം കുത്തിവച്ച് വെളളനിറമുളള ഭാഗം മറ്റൊരു നിറത്തിലേക്ക് മാറ്റുന്നതാണ് ഐബോള്‍ ടാറ്റു എന്നറിയപ്പെടുന്നത്. ജീവിതകാലം മുഴുവന്‍ പിന്നെ ഇതേ നിറത്തിലായിരിക്കും നേത്രഗോളം ഉണ്ടായിരിക്കുക.ഇതിന്റെ ദീര്‍ഘകാലാടിസ്ഥാനത്തിലുളള ഫലം എന്താണെന്ന് ഇതുവരെയും അറിവായിട്ടില്ല.
13 വയസുളളപ്പോഴാണ് താന്‍ ആദ്യമായി ടാറ്റു പതിച്ചതെന്ന് കരണ്‍ പറയുന്നു. 16-ാം വയസ് മുതല്‍ ടാറ്റു ഹോബിയുടെ ഭാഗമായി. മാസങ്ങള്‍ നീണ്ട ആലോചനയ്ക്ക് ശേഷമാണ് താന്‍ കണ്ണില്‍ പച്ചകുത്തിയതെന്ന് കരണ്‍ പറയുന്നു.ഇന്ത്യയില്‍ തനിക്ക് മാത്രമാണെന്നും ഇത്തരം ടാറ്റു ഉള്ളതെന്നാണ് കരണ്‍ അവകാശപ്പെടുന്നത്.
