സീരിയലിലെ രംഗം അനുകരിക്കാന്‍ ശ്രമിച്ചു; ദേഹത്ത് തീകൊളുത്തിയ ഏഴു വയസ്സുകാരിക്ക് ദാരുണാന്ത്യം
ബംഗലൂരു:കന്നഡ ടി.വി സീരിയലിലെ രംഗം അനുകരിക്കാന്‍ ശ്രമിച്ച ഏഴു വയസ്സുകാരിക്ക് ദാരുണാന്ത്യം. സീരിയലിനെ പോലെ ദേഹത്ത് തീ കൊളുത്തിയ പെണ്‍കുട്ടിയാണ് വെന്തുമരിച്ചത്. നവംബര്‍ 11ന് ദേവനാഗിരി ജില്ലയിലെ ഹരിഹരയില്‍ നടന്ന സംഭവമാണെങ്കിലും ഇന്നാണ് പുറംലോകമറിഞ്ഞത്. ദരിദ്ര കുടുംബത്തിലെ ബാലികയ്ക്കാണ് ദാരുണാന്ത്യം സംഭവിച്ചത്.
പ്രാര്‍ത്ഥന എന്ന പെണ്‍കുട്ടിക്കാണ് ഈ ദുരന്തം നേരിട്ടത്. കന്നഡ ചാനലിലെ പ്രശസ്തമായ ‘നന്ദിനി’ ഷോ കണ്ട പെണ്‍കുട്ടി ഷോയിലെ കഥാപാത്രം കാണിച്ചപോലെ തീകൊളുത്തിയ ശേഷം കെടുത്താന്‍ ശ്രമിച്ചു. എന്നാല്‍ തീ പടര്‍ന്നുപിടിച്ചതോടെ പെണ്‍കുട്ടിക്ക് ഗുരുതരമായി പൊള്ളലേല്‍ക്കുകയായിരുന്നു.
സെന്റ് മേരീസ് കോണ്‍വെന്റ് സ്‌കൂളിലെ രണ്ടാം ക്ലാസ് വിദ്യാര്‍ത്ഥിനിയാണ് മരിച്ച പ്രാര്‍ത്ഥന. തീപിടിച്ചാല്‍ അപകടമുണ്ടാകുമെന്ന് തിരിച്ചറിയില്ലാതെ തമാശയായാണ് പെണ്‍കുട്ടി ഇങ്ങനെ പ്രവര്‍ത്തിച്ചതെന്ന് പോലീസ് പറയുന്നു.
