അമിതമായി മദ്യപിച്ച കുട്ടികള്‍ ഗുരുതരാവസ്ഥയില്‍ ; സംഭവം കോട്ടയത്ത്
കോട്ടയം : കോട്ടയം ബ്രഹ്മമംഗലത്താണ് സംഭവം. ബ്രഹ്മമംഗലത്തിന് അടുത്തുള്ള ചെമ്പോലപ്പള്ളില്‍ പാടശേഖരത്താണ് അബോധാവസ്ഥയില്‍ നാല് കുട്ടികളെ കണ്ടെത്തിയത്.പത്തിനും പന്ത്രണ്ടിനുമിടെ പ്രായമുള്ളവരാണ് ഇവര്‍. മദ്യപിച്ച് അബോധാവസ്ഥയിലായ കുട്ടികളെ ആശുപത്രിയില്‍ പ്രവേശിപ്പിച്ചു. ഇവരില്‍ രണ്ടുപേരുടെ നില ഗുരുതരമാണ്. നാട്ടുകാര്‍ വിവരം അറിയിച്ചതിനെത്തുടര്‍ന്ന് പോലീസ് സ്ഥലത്തെത്തി ഇവരെ വൈക്കത്തെ ആശുപത്രിയിലും അവിടെനിന്നും കോട്ടയം മെഡിക്കല്‍ കോളേജിലും എത്തിച്ചു.
ഗുരുതരാവസ്ഥയിലുള്ള രണ്ടുപേര്‍ ഡോക്ടര്‍മാരുടെ നിരീക്ഷണത്തിലാണ്. വീടിന്റെ പാലുകാച്ചല്‍ ചടങ്ങിനിടെ രഹസ്യമായി മദ്യപിച്ച കുട്ടികളാണ് അബോധാവസ്ഥയിലായതെന്ന് കരുതുന്നു. മദ്യപിച്ചശേഷം കൊടുംവെയിലേറ്റതോടെ വിദ്യാര്‍ഥികള്‍ അവശനിലയിലാവുകയായിരുന്നു. അഞ്ചുപേര്‍ ചേര്‍ന്നാണ് മദ്യപിച്ചതെന്ന് വിവരം ലഭിച്ചിട്ടുണ്ട്. ഇവര്‍ക്ക് മദ്യം എവിടെനിന്ന് കിട്ടി എന്നതിനെക്കുറിച്ച് പോലീസ് അന്വേഷണം തുടങ്ങിയിട്ടുണ്ട്. കൂടാതെ അഞ്ചാമനെകുറിച്ചും പോലീസ് അന്വേഷണം ആരംഭിച്ചു.
