ശബരിമല പ്രത്യക്ഷ സമരവുമായി യുഡിഎഫ് ; മുഖ്യമന്ത്രി ആഭ്യന്തരം ഒഴിയണം
ശബരിമല വിഷയത്തില്‍ പ്രത്യക്ഷ സമരത്തിന് യുഡിഎഫ് തീരുമാനം. ശബരിമലയിലെ നിരോധനാജ്ഞ പിന്‍വലിക്കണമെന്ന് പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടു. ഇല്ലെങ്കില്‍ യുഡിഎഫ് നിരോധനാജ്ഞ ലംഘിക്കും. യുഡിഎഫ് സംഘം നാളെ ശബരിമലയിലേക്ക് പോകും. മുഖ്യമന്ത്രി ആഭ്യന്തര വകുപ്പ് ഒഴിയണമെന്നും ചെന്നിത്തല പറഞ്ഞു.
പൊലീസിന്റെ അതിക്രമങ്ങളെ യുഡിഎഫ് ശക്തമായി അപലപിച്ചു . ആവശ്യമില്ലാത്ത നിയന്ത്രണങ്ങളാണ് ശബരിമലയില്‍ ഏര്‍പ്പെടുത്തിയിരിക്കുന്നത്. ശബരിമലയിലെ 144 പിന്‍വലിക്കണം. പൊലീസ് ഭക്തന്മാരോട് കുതിര കയറുകയാണ്. തീര്‍ത്ഥാടകര്‍ പോലും ഇപ്പോള്‍ ശബരിമലയില്‍ വരാത്ത അവസ്ഥയാണ് എന്നും ചെന്നിത്തല പറയുന്നു.
ഭക്തര്‍ക്ക് ശബരിമലയില്‍ വരാന്‍ ഇപ്പോള്‍ പേടിയാണ്. പൊലീസിന്റെ ഈ തേര്‍വാഴ്ച്ച മുഖ്യമന്ത്രിയുടെ നിര്‍ദ്ദേശ പ്രകാരമാണ്. പോലീസിനെ കയറൂരി വിട്ടിരിക്കുകയാണ്. മുഖ്യമന്ത്രി ആഭ്യന്തര വകുപ്പ് ഒഴിയണം. കേരളത്തിലെ മുഖ്യമന്ത്രി ഭക്ത ജനങ്ങളോട് യുദ്ധം പ്രഖ്യാപിച്ചു എന്നും ഹൈക്കോടതി പരാമര്‍ശം സര്‍ക്കാരിന്റെ കണ്ണ് തുറപ്പിക്കണം എന്നും ചെന്നിത്തല കൂട്ടിച്ചേര്‍ത്തു.
