ജി എസ് ടിയുടെ പേരില്‍ തൈരിന് രണ്ട് രൂപ വാങ്ങിയ ഹോട്ടലിന് 15,000 രൂപ പിഴ
ജി എസ് ടി നിലവില്‍ വന്നതിനു ശേഷം ഹോട്ടല്‍ ബിസിനസ് നടത്തുന്നവര്‍ അതിന്റെ പേരില്‍ തോന്നിയ പോലെയാണ് നാട്ടുകാരില്‍ നിന്നും കാശ് പിഴിയുന്നത്. ഹോട്ടല്‍ മുതലാളിമാര്‍ തീരുമാനിക്കുന്നതാണ് പല ഇടങ്ങളിലും ജി എസ് ടി നിരക്ക്. യഥാര്‍ഥ നിരക്കുകള്‍ സാധാരണക്കാര്‍ക്ക് അറിയാത്തത് കൊണ്ട് ഇവരുടെ കൊള്ള ആരും അറിയുന്നുമില്ല.
ഇത്തരത്തില്‍ തൈരിന് രണ്ട് രൂപ ജിഎസ്ടി ഈടാക്കിയ ഹോട്ടലിന് 15000 രൂപ പിഴ ചുമത്തി. തിരുനല്‍വേലിയിലാണ് സംഭവം. 40 രൂപയുടെ തൈരിന് രണ്ട് രൂപ ജി.എസ്.ടിയും രണ്ട് രൂപ പാക്കേജിംഗ് നിരക്കും ഈടാക്കിയതിനെതിരെ ഉപഭോക്താവ് നിയമനടപടി സ്വീകരിക്കുകയായിരുന്നു.
കണ്‍സ്യൂമര്‍ ഫോറത്തെ സമീപിച്ചാണ് ഉപഭോക്താവ് അനുകൂല വിധി നേടിയത്. തൈരിന് ജിഎസ്ടി ഈടാക്കാന്‍ നിയമമില്ലെന്ന് കണ്‍സ്യുമര്‍ കോടതി കണ്ടെത്തി.
രണ്ട് വിഭാഗത്തെയും കേട്ട ശേഷമാണ് കണ്‍സ്യൂമര്‍ കോടതി ശിക്ഷ വിധിച്ചത്. പതിനായിരം രൂപ പിഴയും 5000 രൂപ പരാതിക്കാരന് കേസിന്റെ ചെലവായും നല്‍കാനാണ് കണ്‍സ്യൂമര്‍ കോടതി ഉത്തരവിട്ടത്. ജി.എസ്.ടിയായും പാക്കേജിംഗ് ചര്‍ജായും വാങ്ങിയ അധിക നാല് രൂപയും മടക്കിക്കൊടുക്കാന്‍ കണ്‍സ്യൂമര്‍ കോടതി നിര്‍ദ്ദേശിച്ചു.
ഒരു മാസത്തിനകം പിഴയൊടുക്കിയില്ലെങ്കില്‍ പരാതിക്കാരനില്‍ നിന്ന് ആറ് ശതമാനം നിരക്കില്‍ പലിശ ഈടാക്കുമെന്നും കണ്‍സ്യൂമര്‍ കോടതി ഉത്തരവിട്ടു.
