എച്ച് 1 ബി വിസ നിര്‍ത്തിവയ്ക്കുന്ന ഉത്തരവില്‍ ട്രമ്പ് ഒപ്പുവച്ചു
പി പി ചെറിയാന്‍
വാഷിംങ്ടണ്‍ ഡി.സി: ഇമ്മിഗ്രേഷന്‍ നിയന്ത്രണങ്ങളുടെ ഭാഗമായി എച്ച് 1B വിസ ,ഗസ്റ്റ് വര്‍ക്ക് പ്രോഗ്രാം എന്നിവ താല്‍കാലികമായി നിര്‍ത്തിവയ്ക്കുന്ന ഉത്തരവില്‍ ട്രമ്പ് ഒപ്പുവച്ചു.
ജൂണ്‍ 22 തിങ്കളാഴ്ച വൈകിട്ട് ഒപ്പുവച്ച എക്‌സിക്യൂട്ടിവ് ഉത്തരവ് ജൂണ്‍ 24 മുതല്‍ നിലവില്‍ വരും.
കൊറോണ വൈറസിനെ തുടര്‍ന്ന് ലോക്ഡൗണ്‍ നിലവില്‍ വരികയും ഇവിടെയുള്ള നിരവധി പേര്‍ക്ക് തൊഴില്‍ നഷ്ടപ്പെടുകയും ചെയ്ത സാഹചര്യത്തില്‍ വിദേശ ജോലിക്കാരെ ഒഴിവാക്കി തദ്ദേശീയര്‍ക്കു തൊഴില്‍ നല്‍കുക എന്ന ലക്ഷ്യമാണ് പുതിയ ഉത്തരവിന്റെ പുറകിലുള്ളതെന്നു അറിയുന്നു.
H-1B ടെക്ക് വര്‍ക്കര്‍ വിസ, H-2B സീസണല്‍ വര്‍ക്കര്‍ വിസ, എഡ്യൂക്കേഷന്‍ എക്‌സ്‌ചേഞ്ച് വിസിറ്റര്‍ വിസ, എല്‍ എക്‌സിക്യൂട്ടിവ് ട്രാന്‍സ്ഫര്‍ വിസ എന്നിവയാണ് ഡിസംബര്‍ 31 വരെ തല്‍ക്കാലം നിര്‍ത്തിവക്കുന്നത്.
എന്നാല്‍, വിസകള്‍ കൈവശമുള്ളവരെ സംബന്ധിച്ച് ഈ ഉത്തരവ് ബാധകമല്ല .ഹെല്‍ത് കെയര്‍ വര്‍ക്കേഴ്‌സിനെ ഉത്തരവിന്റെ പരിധിയില്‍ നിന്നും ഒഴിവാക്കിയിട്ടുണ്ട്. H-2A അഗ്രിക്കള്‍ച്ചര്‍ ഗസ്റ്റ് വര്‍ക്കര്‍ പ്രോഗ്രാമിനും ഉത്തരവ് ബാധകമല്ല.
എക്‌സിക്യൂട്ടിവ് ഉത്തരവ് നിലനില്‍ക്കുന്ന ഡിസംബര്‍ മുപ്പത്തിയൊന്നു വരെ 600,000 സ്‌കില്‍ഡ് തൊഴിലുകളെയാണ് ഇതു സാരമായി ബാധികുക. അമേരിക്കന്‍ സാമ്പത്തിക സ്ഥിതി മെച്ചപ്പെടുന്നതുവരെ ഏതൊരു തൊഴിലിനും തിരഞ്ഞെടുക്കപ്പെടുന്നതിന് അമേരിക്കക്കാര്‍ക്കായിരിക്കണം മുന്‍ഗണന നല്‍കുകയെന്ന് സീനിയര്‍ അഡ്മിനിസ്‌ട്രേഷന്‍ അധികൃതര്‍ പറയുന്നു.
ഡമോക്രാറ്റുകളും ഇമിഗ്രേഷന്‍ ആക്ടിവിസ്‌ററുകളും ഉത്തരവിനെ ശക്തിയായി എതിര്‍ത്തപ്പോള്‍ അമേരിക്കന്‍ തൊഴിലാളികള്‍ ഇതിനെ സ്വാഗതം ചെയ്യുന്നതായി ടെക്‌സസില്‍ നിന്നുള്ള റിപ്പബ്‌ളിക്കന്‍ പ്രതിനിധി ലാന്‍സ് ഗോഡന്‍ പറഞ്ഞു.
