മരുമകളുമായി അവിഹിത ബന്ധം ; 55 കാരനെ ഭാര്യ കഴുത്തറുത്ത് കൊന്നു 

ഉത്തര്‍പ്രദേശിലെ ഭാദോഹി ജില്ലയിലെ ഒരു ഗ്രാമത്തിലാണ് ഞെട്ടിപ്പിക്കുന്ന സംഭവം നടന്നത്. ശനിയാഴ്ച രാത്രിയില്‍ കൊയ്രാന പോലീസ് സ്റ്റേഷന്‍ പരിധിയിലുള്ള ഗ്രാമത്തിലാണ് സംഭവം. ഇളയ മകന്റെ ഭാര്യയുമായി അവിഹിത ബന്ധമുണ്ടെന്ന് ആരോപിച്ച് ആണ് ഭാര്യയും മൂത്ത മരുമകളും ചേര്‍ന്ന് 55 കാരനെ കഴുത്തറുത്ത് കൊന്നത്. ഇയാളെ ആശുപത്രിയില്‍ കൊണ്ടുപോയെങ്കിലും എത്തുന്നതിന് മുന്‍പ് തന്നെ മരിച്ചിരുന്നുവെന്ന് പൊലീസ് പറഞ്ഞു. ഇയാള്‍ക്ക് നാല് ആണ്‍മക്കളുണ്ട്. എല്ലാവരും മുംബൈയില്‍ കുടിയേറ്റ തൊഴിലാളികളാണ്. ഇവരില്‍ രണ്ടുപേര്‍ വിവാഹിതരാണെന്നും ഭാര്യമാര്‍ ഇവിടെ ഗ്രാമത്തില്‍ താമസിക്കുന്നുവെന്നും പോലീസ് പറഞ്ഞു.

ഇയാള്‍ക്ക് ഇളയ മരുമകളുമായി അവിഹിത ബന്ധം ഉണ്ടായിരുന്നു. ഇത് അറിഞ്ഞ ഭാര്യയും മൂത്ത മരുമകളും ഇയാളെ ശക്തമായി എതിര്‍ത്തു. തുടര്‍ന്ന് ഇളയ മരുമകളെ വീട്ടിലേക്ക് അയച്ചു. ഇതില്‍ പ്രകോപിതനായ ഇയാള്‍ കുറച്ചുനാള്‍ മുമ്പ് തന്റെ മൂത്ത മരുമകളെ ആക്രമിക്കുകയും അവളുടെ കണ്ണുകള്‍ക്ക് പരുക്കേറ്റതായും പരാതി ഉള്ളതായി പോലീസ് പറഞ്ഞു. മൂത്ത മരുമകളെയും ഭാര്യയെയും വീട്ടില്‍ നിന്ന് പുറത്താക്കി മറ്റൊരു വീട്ടില്‍ താമസിക്കാന്‍ ഇയാള്‍ നിര്‍ബന്ധിക്കുകയായിരുന്നെന്നും മൊഴിയില്‍ പറയുന്നു. നാലഞ്ചു ദിവസം മുമ്പ് ഇയാള്‍ ഇളയ മരുമകളെ തിരികെ കൊണ്ടുവന്നു. ഇതറിഞ്ഞ ഭാര്യയും മൂത്ത മരുമകളും കൂടി ഇയാളെ കൊലപ്പെടുത്തുകയായിരുന്നു.