മുട്ടില്‍ മരം കൊള്ള ; മുറിച്ചു കടത്തിയത് 106 ഈട്ടിയും 296 തേക്കും
മുട്ടിലില്‍നിന്ന് 106 ഈട്ടി തടികളും തൃശ്ശൂരില്‍നിന്ന് 296 ഈട്ടിയും തേക്കും മുറിച്ചുമാറ്റിയെന്നാണ് വനം വകുപ്പിന്റെ കണ്ടെത്തില്‍. മരംമുറി വിവാദത്തില്‍ വകുപ്പുകള്‍ തമ്മില്‍ തര്‍ക്കമോ ആശയക്കുഴപ്പമോ ഇല്ലെന്ന് റവന്യൂ മന്ത്രി കെ രാജന്‍ പറഞ്ഞു. മുട്ടില്‍ മരംമുറി വിവാദത്തില്‍ വനം വകുപ്പ് നടത്തിയ അന്വേഷണത്തിന്റെ വിവരങ്ങളാണ് പുറത്തുവരുന്നത്. മുട്ടിലില്‍നിന്ന് 106 ഈട്ടി തടികളും തൃശ്ശൂര്‍ ജില്ലയില്‍ ഈട്ടിയും തേക്കുമടക്കം 296 മരങ്ങളും മുറിച്ചുമാറ്റിയെന്നാണ് വകുപ്പിന്റെ പ്രാഥമിക കണ്ടെത്തല്‍. കൂടുതല്‍ ജില്ലകളിലെ പരിശോധന നടന്നുവരികയാണ്. ഇതുകൂടി ചേര്‍ത്തുള്ള അന്തിമ റിപ്പോര്‍ട്ട് വനം മന്ത്രിക്കും നിലവില്‍ കേസ് അന്വേഷിക്കുന്ന സംഘങ്ങള്‍ക്കും കൈമാറും.
മരംമുറി നടന്നത് റിസര്‍വ് ഫോറസ്റ്റില്‍നിന്നല്ലെന്നും വനത്തിനോട് ചേര്‍ന്ന റവന്യൂ പട്ടയഭൂമിയില്‍നിന്നാണെന്നുമാണ് വനം വകുപ്പ് അന്വേഷണത്തില്‍ കണ്ടെത്തിയിരിക്കുന്നത്. അന്തിമ റിപ്പോര്‍ട്ട് കിട്ടിയ ശേഷമായിരിക്കും സര്‍ക്കാര്‍ തുടര്‍നടപടി സ്വീകരിക്കുക. അതേസമയം, മരംമുറിയുമായി ബന്ധപ്പെട്ട സര്‍ക്കാര്‍ ഉത്തരവില്‍ അവ്യക്തതയില്ലെന്ന് റവന്യൂ മന്ത്രി കെ രാജന്‍ വ്യക്തമാക്കി. ക്രൈംബ്രാഞ്ച് അടക്കമുള്ള അന്വേഷണസംഘങ്ങളുടെ പരിശോധനാ റിപ്പോര്‍ട്ട് വേഗത്തിലാക്കണമെന്ന നിര്‍ദേശവും സര്‍ക്കാര്‍ നല്‍കിയിട്ടുണ്ടെന്നും മന്ത്രി അറിയിച്ചു.
