കനത്ത ചൂട് ; കാനഡയില് മരണസംഖ്യ 700 കടന്നു
പടിഞ്ഞാറന് കാനഡയില് മരണസംഖ്യ കുത്തനെ ഉയരുന്നു. ബ്രിട്ടീഷ് കൊളംബിയ പ്രവിശ്യയില് മാത്രം ഒരാഴ്ചക്കിടെ 719 പേര് മരിച്ചതായാണ് റിപ്പോര്ട്ടുകള്. ചൂട് കൂടിയതോടെ പലയിടങ്ങളിലും വന്തോതില് അഗ്നിബാധയും റിപ്പോര്ട്ട് ചെയ്തിട്ടുണ്ട്. 130 തീപിടിത്ത സംഭവങ്ങളാണ് കഴിഞ്ഞ ദിവസങ്ങളിലുണ്ടായത്. ആയിരം വര്ഷങ്ങള്ക്കിടെ ഏറ്റവും കഠിനമായ ചൂടാണ് പ്രവിശ്യയിലെ ലിട്ടന് നഗരത്തില് രേഖപ്പെടുത്തിയത്. 49.6 ഡിഗ്രിയാണ് കഴിഞ്ഞ ദിവസം ലിട്ടണില് രേഖപ്പെടുത്തിയ ചൂട്. ഇവിടെ രണ്ടു പേരുടെ മരണവും സ്ഥിരീകരിച്ചിട്ടുണ്ട്.
കാനഡയിലെ അല്ബേര്ട്ട, സസ്കെച്വാന്, മനിടോബ, വടക്ക്- പടിഞ്ഞാറന് മേഖലകള്, നോര്ത്തേണ് ഒണ്ടാറിയോ എന്നിവിടങ്ങളിലെല്ലാം ഉഷ്ണതരംഗം ശക്തമായി തുടരുകയാണ്. കാനഡയ്ക്ക് പുറമേ അമേരിക്കയിലും ഉഷ്ണതരംഗം ശക്തമാണ്. ഒറിഗനിലും വാഷിങ്ടണിലും നിരവധിപേര് മരിച്ചതായി ആരോഗ്യ വകുപ്പ് അധികൃതര് വ്യക്തമാക്കിയിരുന്നു. അതേസമയം, നിരന്തരം സംഭവിക്കുന്ന ഇടിമിന്നലുകളാണ് അഗ്നിബാധ വര്ധിപ്പിക്കുന്നതെന്നാണ് അധികൃതരുടെ വിശദീകരണം. 12,000 ഇടിമിന്നലുകളാണ് ബ്രിട്ടീഷ് കൊളംബിയയില് രേഖപ്പെടുത്തിയത്. രാജ്യം ഭീതിയിലായതോടെ വിഷയം ചര്ച്ച ചെയ്യാന് പ്രധാനമന്ത്രി ജസ്റ്റിന് ട്രൂഡോ അടിയന്തര യോഗം വിളിച്ചുചേര്ത്തിട്ടുണ്ട്.