പ്രണയ പക ; കണ്ണൂരില്‍ യുവതിയെ വീട്ടില്‍ കയറി കഴുത്തറുത്ത് കൊന്നു
പാനൂര്‍ : യുവതിയെ അജ്ഞാതനായ യുവാവ് വീട്ടില്‍ കയറി കഴുത്തറുത്ത് കൊന്നു.കണ്ണൂര്‍ വള്ള്യായിയില്‍ നടേമ്മന്‍ കല്ലാങ്കണ്ടിയിലെ വിഷ്ണു പ്രിയ (23)യാണ് കൊല്ലപ്പെട്ടത്. വീട്ടിലെ കിടപ്പുമുറിയിലാണ് കഴുത്തറുത്ത നിലയില്‍ മൃതദേഹം കണ്ടെത്തിയത്. ഇന്ന് രാവിലെ പത്ത് മണിയോടെയാണ് കൊലപാതകം നടന്നത്. വീട്ടില്‍ വിഷ്ണുപ്രിയ മാത്രമുണ്ടായിരുന്ന സമയത്താണ് പ്രതി മുഖംമൂടി ധരിച്ചെത്തിയത്. പ്രതി മുഖംമൂടി ധരിച്ചാണ് വന്നതെന്ന് സമീപവാസിയുടെ മൊഴിയുണ്ടെങ്കിലും പൊലീസ് ഇക്കാര്യം സ്ഥിരീകരിക്കുന്നില്ല.
നാല് മാസമായി പാനൂര്‍ നൂക്ലിയസ് ആശുപത്രിയിലെ ഫാര്‍മസി ജീവനക്കാരിയായിരുന്നു വിഷ്ണുപ്രിയ. പെണ്‍കുട്ടിയുടെ അടുത്ത ബന്ധുവിന്റെ മരണാനന്തര ചടങ്ങായിരുന്നു. തറവാട്ട് വീട്ടില്‍ നിന്ന് വസ്ത്രം മാറാനും മറ്റുമായി വീട്ടിലെത്തിയതായിരുന്നു വിഷ്ണുപ്രിയ. തിരിച്ചു വരാതിരുന്നപ്പോള്‍ കുടുംബാംഗങ്ങള്‍ അന്വേഷിച്ച് വരികയായിരുന്നു. ഈ സമയത്താണ് രക്തത്തില്‍ കുളിച്ച് കിടക്കുന്ന നിലയില്‍ യുവതിയുടെ മൃതദേഹം കണ്ടെത്തിയത്. പ്രതിയെക്കുറിച്ച് ചില സൂചനകള്‍ ലഭിച്ചിട്ടുണ്ട്. വിഷ്ണുപ്രിയയുടെ പിതാവ് വിനോദ് ഖത്തറിലാണ്. കുറച്ച് ദിവസം മുമ്പാണ് അവധിക്ക് നാട്ടില്‍ വന്ന ഇദ്ദേഹം ഖത്തറിലേക്ക തിരികെ പോയത്. സംഭവത്തെ തുടര്‍ന്ന് സിറ്റി പൊലീസ് കമ്മീഷണര്‍ ആര്‍ ഇളങ്കോ സംഭവസ്ഥലത്തേക്ക് തിരിച്ചു.
കൊലപാതകത്തിന് പിന്നില്‍ പ്രണയത്തിന്റെ പേരിലുള്ള പകയെന്ന് പോലീസ് സംശയം. പെണ്‍കുട്ടിയെ കുറിച്ചും വീടിനെ കുറിച്ചും വ്യക്തമായ അറിവുള്ള ആളാണ് കൊലപാതകി എന്ന് പോലീസ് പറയുന്നു. വിഷ്ണു പ്രിയയുടെ കോള്‍ റിക്കാര്‍ഡും മറ്റും പരിശോധിക്കുവാനാണ് പോലീസ് തീരുമാനം.
