മുഖപത്രത്തിലെ വാര്‍ത്തകളെയും മന്ത്രി ജി സുധാകരന്റെ പ്രസ്താവനയെയും തളളാതെ മാണി; മുഖ്യമന്ത്രി പദത്തിനായി ആഗ്രഹിച്ചിട്ടില്ല
കേരളകോണ്‍ഗ്രസ് എം. പാര്‍ട്ടി മുഖപത്രത്തിലെ വാര്‍ത്തകളെയും മന്ത്രി ജി. സുധാകരന്റെ പ്രസ്താവനയെയും തളളാതെ കേരള കോണ്‍ഗ്രസ് നേതാവ് കെ.എം മാണി. മുഖപത്രമായ പ്രതിഛായയില്‍ വന്ന കാര്യങ്ങള്‍ തന്നോട് ആലോചിച്ചോ താന്‍ അറിഞ്ഞോ ഉളളതല്ല. അവര്‍ അവരുടെതായ നിരീക്ഷണം നടത്തിക്കാണും. മുഖ്യമന്ത്രി പദത്തിനായി ആഗ്രഹിച്ചിട്ടില്ല. അതിനായി ഒന്നും ചെയ്തിട്ടില്ലെന്നും മാണി പറഞ്ഞു.
യു.ഡി.എഫിനെ അട്ടിമറിച്ച് അധികാര സ്ഥാനത്തിനുവേണ്ടി ഒന്നും ചെയ്തിട്ടില്ല. സംരക്ഷിക്കുന്നതിനുളള നടപടികളാണ് എടുത്തിട്ടുളളത്. സുധാകരന്റെ അറിവ് വെച്ച് സുധാകരന്‍ പറയുന്നു. അദ്ദേഹം പറഞ്ഞ കാര്യങ്ങള്‍ താന്‍ കേട്ടിട്ടില്ല. സുധാകരന്‍ വളരെ മാന്യനായ വ്യക്തിയാണ്. അദ്ദേഹം പറഞ്ഞ കാര്യങ്ങള്‍ അവിശ്വസിക്കേണ്ട കാര്യമില്ല. എല്‍.ഡി.എഫുമായി ചര്‍ച്ചകള്‍ക്ക് ആരെയും ചുമതലപ്പെടുത്തിയിട്ടില്ലെന്നും അദ്ദേഹം പറഞ്ഞു.
ചില നേതാക്കള്‍ മുഖ്യമന്ത്രി സ്ഥാനം വാഗ്ദാനം ചെയ്തിരുന്നതായി മുഖപ്രസംഗത്തില്‍ വ്യക്തമാക്കുന്നു. നേരത്തെ മന്ത്രി ജി. സുധാകരന്‍ ഇക്കാര്യം പ്രസംഗത്തില്‍ സൂചിപ്പിക്കുകയും വിവാദമാകുകയും ചെയ്തിരുന്നു. ഇതിനെ തുടര്‍ന്നാണ് കെ.എം മാണിയുടെ മറുപടി.
