ഞാന്‍ ചോത്തി ആയിട്ടോ മറ്റോ ആണ്; ഗൗരിയമ്മ മാധ്യമപ്രവര്‍ത്തകരുടെ ചോദ്യത്തിന് നല്‍കിയ മറുപടിയാണിത്
ഇ.എം.എസോ.. ഞാന്‍ ചോത്തി ആയിട്ടോ മറ്റോ ആണ്. അല്ലെങ്കില്‍ പിന്നെങ്ങെനാ? ഇന്ന് ഗൗരിയമ്മ മാധ്യമപ്രവര്‍ത്തകരുടെ ചോദ്യത്തിന് നല്‍കിയ മറുപടിയാണിത്. ഇ.എം.എസ്. തന്നെ മുഖ്യമന്ത്രിയാക്കാതിരുന്നത് ഈഴവജാതിയില്‍ പെട്ടതിനാലാണെന്ന് കെ.ആര്‍. ഗൗരിയമ്മ പറഞ്ഞു.
വര്‍ഷങ്ങള്‍ക്ക് മുമ്പ് ഗൗരിയമ്മ മുഖ്യമന്ത്രിയാകുമെന്ന് പ്രചരിപ്പിച്ച ശേഷം ഒഴിവാക്കിയതിനേക്കുറിച്ച് മാധ്യമപ്രവര്‍ത്തകര്‍ ആരാഞ്ഞപ്പോഴാണ് നാളെ 99ാം പിറന്നാള്‍ ആഘോഷിക്കുന്ന ഗൗരിയമ്മ ഇങ്ങനെ പ്രതികരിച്ചത്.
മുഖ്യമന്ത്രിയാക്കാത്തതില്‍ തനിക്ക് പരിഭവമില്ല. മന്ത്രിയോ മുഖ്യമന്ത്രിയോ രാഷ്ട്രീയക്കാരിയോ എന്നതൊന്നും പരിഗണിക്കാതെ ജനങ്ങളുടെ പ്രശ്‌നങ്ങള്‍ ഏറ്റെടുത്ത് പ്രവര്‍ത്തിയാളാണ് താനെന്നും ജെ.എസ്.എസ്. ഇടത് മുന്നണിക്കൊപ്പം നിന്നിട്ടും ഘടകകക്ഷിയാക്കുന്ന കാര്യം പറയാന്‍ വൈക്കം വിശ്വനോ കോടിയേരി ബാലകൃഷ്ണനോ വന്നില്ലെന്നും ഗൗരിയമ്മ പറഞ്ഞു.
