രാഹുല്‍ഗാന്ധിക്ക് പരസ്യ പിന്തുണയുമായി ശിവസേന
കോണ്ഗ്രസ് അധ്യക്ഷന്‍ രാഹുല്‍ഗാന്ധിക്ക് പരസ്യ പിന്തുണയുമായി ശിവസേന. ശിവസേന മുഖപത്രമായ സാമ്‌നയിലാണ് “അവിശ്വാസ പ്രമേയത്തെ മറികടക്കാന്‍ മോദി സര്‍ക്കാരിന് കഴിഞ്ഞുവെങ്കിലും ഹൃദയംകൊണ്ട് വിജയിച്ചത് രാഹുല്‍ഗാന്ധിയായിരുന്നു” എന്ന് വാര്‍ത്ത വന്നത്. ബെഞ്ചില്‍ നിന്നും ഇറങ്ങി വന്ന് പ്രധാനമന്ത്രിയെ രാഹുല്‍ കെട്ടിപിടിക്കുന്ന ചിത്രമടക്കം ഉള്‍പ്പെടുത്തി വലിയ വാര്‍ത്ത നല്‍കിയാണ്‌ സാമ്‌ന രാഹുലിന്റെ ലോക്‌സഭയിലെ പ്രകടനത്തെ റിപ്പോര്‍ട്ട് ചെയ്തിരിക്കുന്നത്. ഇതാദ്യമായാണ് കോണ്‍ഗ്രസിനേയും രാഹുലിനേയും പിന്തുണച്ച് കൊണ്ട് സാമ്‌ന ഇത്ര വലിയ വാര്‍ത്ത നല്‍കിയിരിക്കുന്നത്.
ലോക്‌സഭയിലെ രാഹുലിന്റെ പ്രസംഗം തെളിയിക്കുന്നത് അദ്ദേഹം യഥാര്‍ഥ രാഷ്ട്രീയ സ്‌കൂളില്‍ നിന്ന് ബിരുദം നേടി കഴിഞ്ഞുവെന്നാണെന്ന് കഴിഞ്ഞ ദിവസം ശിവസേന നേതാവും സാമ്‌നയുടെ അസോസിയേറ്റ് എഡിറ്ററുമായ സഞ്ജയ് റാവത്തും പ്രതികരിച്ചിരുന്നു. രാഹുല്‍ ഗാന്ധിയുടെ ആലിംഗനത്തെ ഇത് വെറും ആലിംഗനമല്ല മറിച്ച് മോദിക്ക് നല്‍കിയ ഷോക്കായിരുന്നുവെന്നാണ് റാവത്ത് പറയുന്നത്. രാഹുല്‍ രാജ്യത്തെ നയിക്കാന്‍ സന്നദ്ധനാണെന്ന് ആദ്യം പറഞ്ഞത് ശിവസേനയാണ്.
ഇക്കാര്യം ഇപ്പോള്‍ തെളിഞ്ഞിരിക്കുകയാണ് എന്നും അദ്ദേഹം പറയുന്നു. കഴിഞ്ഞ കുറച്ചു നാളുകളായി മോദിക്കും ബിജെപിക്കും എതിരെ ഇപ്പോള്‍ രൂക്ഷമായ വിമര്‍ശനങ്ങള്‍ ആണ് ശിവസേന നടത്തുന്നത്. അതുമാത്രമല്ല കഴിഞ്ഞ ദിവസത്തെ അവിശ്വാസ പ്രമേയ ചര്‍ച്ചയില്‍ നിന്നും ശിവസേന വിട്ട് നില്‍ക്കുകയും ചെയ്തിരുന്നു.
