ലോക്ഡൗണിനിടെ കുട്ടികളുടെ ആത്മഹത്യകള്‍ കൂടുന്നു ; ഇതുവരെ ആത്മഹത്യ ചെയ്തത് 173 കുട്ടികള്‍
ലോക്ഡൗണിനിടെ സംസ്ഥാനത്ത് കുട്ടികളുടെ ആത്മഹത്യ വര്‍ദ്ധിച്ചതായി റിപ്പോര്‍ട്ട്. 173 കുട്ടികള്‍ ആണ് ഈ കാലയളവില്‍ ആത്മഹത്യ ചെയ്തത്. പത്തിനും 18 നുമിടയിലുള്ളവരിലാണ് ആത്മഹത്യ പ്രവണത കൂടിയത്. പാലക്കാട്, തിരുവനന്തപുരം റൂറല്‍, മലപ്പുറം, വയനാട്, ആലപ്പുഴ എന്നിവിടങ്ങളിലാണ് കൂടുതല്‍ ആത്മഹത്യകള്‍ നടന്നത്. പൊലീസ് പുറത്തുവിട്ട കണക്കുകളിലാണ് ഞെട്ടിക്കുന്ന വിവരങ്ങളുള്ളത്.
മാനസിക പിരിമുറുക്കമാണ് ഭൂരിഭാഗം ആത്മഹത്യകള്‍ക്കും പിന്നിലെന്നുമാണ് കണ്ടെത്തല്‍. ലോക്‌ഡൌണ്‍ തുടങ്ങിയ മാര്‍ച്ച് 23 മുതല്‍ ഈ മാസം വരെയുള്ള കണക്കുകളാണ് ഇപ്പോള്‍ പുറത്ത് വിട്ടിരിക്കുന്നത്. 173 പേര്‍ ആത്മഹത്യ ചെയ്തതില്‍ 154 പേരും തൂങ്ങി മരിക്കുകയായിരുന്നു. മാനസിക പിരിമുറുക്കത്തിന് പുറമെ നിസാരമായ പ്രശ്‌നങ്ങള്‍ പോലും ആത്മഹത്യക്ക് കാരണമായി മാറുന്നുവെന്നാണ് അധികൃതര്‍ പറയുന്നത്. അതുപോലെ വീടുകളില്‍ മാതാപിതാക്കള്‍ തമ്മില്‍ ഉണ്ടാകുന്ന പ്രശ്‌നങ്ങളും കുട്ടികളെ ജീവിതം അവസാനിപ്പിക്കുന്നതിനെ കുറിച്ച് ചിന്തിപ്പിക്കുന്നു എന്നും റിപ്പോര്‍ട്ട് പറയുന്നു.
