തിരുവനന്തപുരത്തെ വിജയം: കേരള രാഷ്ട്രീയത്തിലെ നിര്ണായക നിമിഷമെന്ന് പ്രധാനമന്ത്രി
ഡല്ഹി: തിരുവനന്തപുരം കോര്പ്പറേഷനിലെ എന്ഡിഎയുടെ വിജയം കേരള രാഷ്ട്രീയത്തിലെ നിര്ണായക നിമിഷം എന്ന് പ്രധാനമന്ത്രി നരേന്ദ്ര മോദി. സംസ്ഥാനത്തിന്റെ വികസന അഭിലാഷങ്ങള് നിറവേറ്റാന് ബിജെപിക്കും എന്ഡിഎയ്ക്കും മാത്രമേ കഴിയൂ എന്ന് ജനങ്ങള്ക്ക് ഉറപ്പുണ്ടെന്നും തിരുവനന്തപുരത്തിന് നന്ദി പറയുന്നതായും പ്രധാനമന്ത്രി എക്സില് കുറിച്ചു.
തിരഞ്ഞെടുപ്പ് വിജയത്തിനു പിന്നില് പ്രവര്ത്തിച്ച എല്ലാ ബിജെപി പ്രവര്ത്തകര്ക്കും നന്ദി അറിയിക്കുന്നതായും അദ്ദേഹം പറഞ്ഞു. ”തിരുവനന്തപുരം കോര്പ്പറേഷനില് മികച്ച വിജയം ഉറപ്പാക്കാന്, ജനങ്ങള്ക്കിടയില് പ്രവര്ത്തിച്ച കഠിനാധ്വാനികളായ എല്ലാ ബിജെപി കാര്യകര്ത്താക്കള്ക്കും ഞാന് നന്ദി അറിയിക്കുന്നു. ഇന്നത്തെ ഈ ഫലം യാഥാര്ഥ്യമാക്കാന് സഹായിച്ച, താഴേത്തട്ടില് പ്രവര്ത്തിച്ച, കേരളത്തിലെ വിവിധ തലമുറകളിലെ കാര്യകര്ത്താക്കളുടെ പ്രവര്ത്തനങ്ങളും പോരാട്ടങ്ങളും അനുസ്മരിക്കേണ്ട ദിനം കൂടിയാണിന്ന്. നമ്മുടെ കാര്യകര്ത്താക്കളാണു നമ്മുടെ കരുത്ത്. അവരെയോര്ത്തു നാം അഭിമാനിക്കുന്നു,” മോദി കുറിച്ചു.
അതേസമയം, ബിജെപിയുടെ വികസിത കേരളം എന്ന മുദ്രാവാക്യം ജനങ്ങള് സ്വീകരിച്ചതിനു തെളിവാണ് തദ്ദേശ തിരഞ്ഞെടുപ്പിലെ എന്ഡിഎയുടെ മുന്നോറ്റമെന്ന് ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര് പറഞ്ഞു. പത്തു കൊല്ലത്തെ എല്ഡിഎഫ് ഭരണത്തിലെ അഴിമതിയും ശബരിമലയില് ചെയ്ത ദ്രോഹത്തിനുമുള്ള മറുപടിയാണ് ഇന്ന് ജനങ്ങള് നല്കിയിരിക്കുന്നതെന്നും അദ്ദേഹം കൂട്ടിച്ചേര്ത്തു.
ഈ ഊര്ജസ്വലമായ നഗരത്തിന്റെ വളര്ച്ചയ്ക്കായും ജനങ്ങളുടെ ജീവിതസൗകര്യം മെച്ചപ്പെടുത്തുന്നതിനും ബിജെപി പ്രവര്ത്തിക്കുമെന്നും അദ്ദേഹം കുറിച്ചു. ബിജെപി, എന്ഡിഎ സ്ഥാനാര്ത്ഥികള്ക്ക് വോട്ട് ചെയ്ത കേരളത്തിലുടനീളമുള്ള ജനങ്ങള്ക്ക് നന്ദി അറിയിക്കുന്നതായും മറ്റൊരു പോസ്റ്റിലൂടെ മോദി അറിയിച്ചു.
കേരളം യുഡിഎഫിനെയും എല്ഡിഎഫിനെയും മടുത്തുവെന്നും നല്ല ഭരണം കാഴ്ചവയ്ക്കാനും എല്ലാവര്ക്കും അവസരങ്ങളുള്ള ഒരു വികസിത കേരളം കെട്ടിപ്പടുക്കാനും കഴിയുന്ന ഒരേയൊരു തിരഞ്ഞെടുപ്പായി ജനങ്ങള് എന്ഡിഎയെ കാണുന്നുവെന്നും പ്രധാനമന്ത്രി എക്സില് കുറിച്ചു.
