മൂന്ന് വയസ്സുകാരന് മർദ്ദനമെറ്റ സംഭവം ; പിന്നില്‍ മാതാവെന്ന് പൊലീസ് ; അറസ്റ്റ് ഇന്നുണ്ടാകുമെന്ന് സൂചന
കൊച്ചിയില്‍ മൂന്ന് വയസ്സുകാരനെ മര്‍ദ്ദിച്ചത് മാതാവെന്ന് പൊലീസ്. മാതാവ് കുറ്റം ഏറ്റ് പറഞ്ഞുവെന്നും കുട്ടി അനുസരണക്കേട് കാട്ടിയതിന് മര്‍ദ്ദിച്ചതെന്നും മാതാവ് പൊലീസിനോട് പറഞ്ഞു. കുട്ടിയുടെ മാതാവിന്റെ അറസ്റ്റ് ഇന്നുണ്ടാകുമെന്നാണ് സൂചന.
തലയോട്ടിയില്‍ പൊട്ടലും ശരീരമാസകലും പൊള്ളലേറ്റ പാടുകളുള്ള ആണ്‍കുട്ടി അതീവ ഗുരുതരാവസ്ഥയിലാണ്. ജീവന്‍ നിലനിര്‍ത്താന്‍ വെന്റിലേറ്ററില്‍ പ്രവേശിപ്പിച്ച കുട്ടിയെ അടിയന്തിര ശസ്ത്രക്രിയക്ക് വിധേയനാക്കുകയായിരുന്നു. അമ്മയുടെ കൈയില്‍ നിന്ന് താഴെ വീണെന്ന് പറഞ്ഞാണ് പിതാവ് കുട്ടിയെ ആശുപത്രിയിലെത്തിച്ചത്. എന്നാല്‍ കുട്ടിയുടെ ഗുരുതരാവസ്ഥ ബോധ്യപ്പെട്ടതോടെ ആശുപത്രി അധികൃതര്‍ പോലീസില്‍ അറിയിക്കുകയായിരുന്നു.
നേരത്തെ സംഭവത്തില്‍ പൊലീസ് മാതാപിതാക്കള്‍ക്കെതിരെ വധശ്രമത്തിന് കേസെടുത്തിരുന്നു. ജുവനൈല്‍ ജസ്റ്റിസ് Sec 75 , 307 ഐപിസ് എന്നീ വകുപ്പുകള്‍ പ്രകാരമാണ് കേസ്. കുട്ടിയുടെ അമ്മ ജാര്‍ഖണ്ഡ് സ്വദേശിയും അഛന്‍ പശ്ചിമ ബംഗാള്‍ സ്വാദേശിയുമാണ്. 20 ദിവസം മുമ്പാണ് കുട്ടിയും അമ്മയും നാട്ടിലെത്തിയത്. ഇവര്‍ ജോലി ചെയ്യുന്ന കമ്പനിയില്‍ പോലീസ് അനേഷണം നടത്തി. കൊണ്ടു വന്ന ഏജന്റുമാരെയും വിളിച്ച് വരുത്തി ചോദ്യം ചെയ്തു.
