നാളെ മുതല് വീണ്ടും പരിശോധന ; രാത്രി 10 മണിക്ക് ശേഷമുള്ള യാത്രകള് ഒഴിവാക്കണം
കൊവിഡ് കേസുകള് കുറയ്ക്കുന്നതിന്റെ ഭഗമായി സംസ്ഥാനത്ത് നാളെ മുതല് പൊലീസ് നീരീക്ഷണം കൂടുതല് ശക്തിപ്പെടുത്തുമെന്നു മുഖ്യമന്ത്രി പിണറായി വിജയന്. സംസ്ഥാനത്ത് ജനങ്ങളില് ജാഗ്രതക്കുറവ് സംഭവിച്ചുവെന്ന് പിണറായി വിജയന് പറയുന്നു. കൊവിഡ് പശ്ചാത്തലത്തില് സര്ക്കാര് മാനദണ്ഡങ്ങള് പാലിക്കുന്നതിലും, മാസ്ക് ധരിക്കുന്നതിലും വീഴ്ചയുണ്ടാക്കി. ജനങ്ങള് സ്വയം ജാഗ്രത പാലിക്കുക പ്രധാനമാണെന്ന് മുഖ്യമന്ത്രി പറഞ്ഞു. ജനങ്ങള് കൂടുതല് എത്തിച്ചേരുന്ന സ്ഥലങ്ങളില് മുന്കരുതലുകള് പാലിക്കുന്നുവെന്ന് ഉറപ്പ് വരുത്തുമെന്ന് മുഖ്യമന്ത്രി പറഞ്ഞു. സെക്ട്രല് മജിസ്ട്രേറ്റുമാരെ കൂടുതലായി വിന്യസിക്കും. നാളെ രാവിലെ മുതല് ഫെബ് 10 വരെ പൊതു സ്ഥലങ്ങളില് പരിശോധന നടത്തും. 25,000 പൊലീസ് ഉദ്യോഗസ്ഥരെ ഇതിനായി വിന്യസിക്കും.
രോഗ വ്യാപനത്തിന് ഇടയാക്കുന്ന ആള്ക്കൂട്ടങ്ങള് ഒഴിവാക്കണമെന്നും അടഞ്ഞ ഹാളുകളില് ആള്ക്കൂട്ടങ്ങള് നിര്ബന്ധമായും ഒഴിവാക്കണമെന്നും മുഖ്യമന്ത്രി പറഞ്ഞു. ചടങ്ങുകള് തുറസയ സ്ഥലങ്ങളില് സാമൂഹിക അകലം പാലിച്ച് നടത്തണം. വിവാഹ ചടങ്ങുകളില് പങ്കാളിത്തം പരിമിതപ്പെടുത്തണമെന്നും ഇതിനായി ഹാള് ഉടമകള് സഹകരിക്കണമെന്നും മുഖ്യമന്ത്രി പറഞ്ഞു. രാത്രി യാത്ര നിരോധിക്കുന്നില്ലെങ്കിലും പത്ത് മണിക്ക് ശേഷമുള്ള യാത്ര പരമാവധി ഒഴിവാക്കണമെന്നും മുഖ്യമന്ത്രി പറഞ്ഞു. സംസ്ഥാനത്ത് മാസ്ക് ഉപയോഗം കുറഞ്ഞു വരുന്നുണ്ടെന്നും നിയന്ത്രണങ്ങളില് അയവ് വന്നപ്പോള് കൊവിഡിനെ ഭയക്കേണ്ടതില്ലെന്ന ചിന്ത ജനങ്ങളില് വന്നുവെന്നും മുഖ്യമന്ത്രി പറഞ്ഞു. സംസ്ഥാനം കൊവിഡിനെതിരെ മാതൃകാപരമയാണ് പൊരുതുന്നത്. ഒത്തൊരുമിച്ചുള്ള പ്രവര്ത്തനത്തിലൂടെയേ കൊവിഡിനെ മറികടക്കാനാകുവെന്നും മുഖ്യമന്ത്രി പറഞ്ഞു.
