കുറ്റ്യാടി ; നേതൃത്വത്തിനെതിരെ സിപിഎം പ്രവര്ത്തകര് തെരുവില്
കുറ്റ്യാടിയില് സിപിഎം പ്രവര്ത്തകരുടെ പ്രതിഷേധം പൊതുനിരത്തിലെത്തി. കുറ്റ്യാടി സീറ്റ് കേരള കോണ്ഗ്രസിന് നല്കിയതില് പ്രതിഷേധിച്ചാണ് പ്രതിഷേധം. കുറ്റ്യാടി ജോസ് വിഭാഗത്തിന് കൊടുത്ത തീരുമാനത്തില് സിപിഎം ഒരു മാറ്റവും വരുത്തിയില്ല. ഈ സാഹചര്യത്തിലാണ് സ്ത്രീകളടക്കം നിരവധി പേര് തെരുവിലിറങ്ങിയത്. കഴിഞ്ഞ ദിവസമുണ്ടായ പ്രതിഷേധത്തേക്കാള് വലിയ പ്രതിഷേധമാണ് ഇന്നുണ്ടായത്. കുറ്റ്യാടിയുടെ പല ഭാഗങ്ങളില് നിന്നായി പ്രവര്ത്തകര് പ്രതിഷേധത്തില് അണിനിരക്കുകയായിരുന്നു. പാര്ട്ടി കൊടിയുമേന്തിയാണ് പ്രതിഷേധം.
സിപിഎം കേന്ദ്ര കമ്മിറ്റിക്ക് കുറ്റ്യാടിയില് നിന്ന് കത്ത് അയക്കുകയും ചെയ്തു. സിപിഎം കുറ്റ്യാടി മണ്ഡലം കമ്മിറ്റിയാണ് കത്ത് നല്കിയത്. കുറ്റ്യാടി സീറ്റില് സിപിഎം തന്നെ മത്സരിക്കണമെന്ന് ആവശ്യപ്പെട്ടായിരുന്നു കത്ത്. സിപിഎം സ്ഥാനാര്ഥി തന്നെ കുറ്റ്യാടിയില് വേണമെന്നും മണ്ഡലത്തില് ജോസ് വിഭാഗത്തിന് സ്വാധീനമില്ലെന്നുമാണ് പ്രവര്ത്തകര് ചൂണ്ടിക്കാട്ടിയത്. രണ്ടില ചിഹ്നത്തില് തങ്ങള്ക്ക് സ്ഥാനാര്ത്ഥി വേണ്ടെന്നും അരിവാള് ചുറ്റിക ചിഹ്നത്തില് തന്നെ സ്ഥാനാര്ത്ഥി വേണമെന്നും പ്രതിഷേധക്കാര് പറയുന്നു.
