ലോകത്തിന്റെ വിവിധ ഭാഗങ്ങളിലായി ഉത്തരം തരാതെ നാല് ലോഹത്തൂണുകള്‍
ലോകത്തെ അംബരിപ്പിച്ച ലോഹത്തൂണ്‍ പിറ്റ്‌സ്ബര്‍ഗിലും ഉയര്‍ന്നു. യൂടായ്ക്കും, റൊമാനിയയ്ക്കും, കാലിഫോര്‍ണിയയ്ക്കും പിന്നാലെയാണ് പിറ്റ്‌സ്ബര്‍ഗിലും തൂണ്‍ കാണപ്പെട്ടത്. നേരത്തെ ആളൊഴിഞ്ഞ പ്രദേശങ്ങളായ മരുഭൂമിയിലും കുന്നിന്‍മുകളിലുമാണ് ലോഹത്തൂണ്‍ കണ്ടതെങ്കില്‍ പിറ്റ്‌സ്ബര്‍ഗില്‍ ജനക്കൂട്ടത്തിന് ഒത്ത നടുവിലാണ് ലോഹത്തൂണ്‍ സ്ഥിതി ചെയ്യുന്നത്. പിറ്റ്‌സ്ബര്‍?ഗിലെ ഒരു ബേക്കറിക്ക് മുന്നിലാണ് ഒറ്റരാത്രികൊണ്ട് പ്രത്യക്ഷപ്പെട്ടത്.
നവംബര്‍ പകുതിയോടെയാണ് ലോകത്തിന്റെ വിവിധ കോണുകളിലായി തിളങ്ങുന്ന ലോഹത്തൂണുകള്‍ മുളച്ച് തുടങ്ങിയത്. ആദ്യം പ്രത്യക്ഷപ്പെട്ടത് യൂടായിലായിരുന്നു. ഹെലികോപ്റ്ററില്‍ ആടുകളെ നോക്കിയിറങ്ങിയവരാണ് യൂടായില്‍ നിഗൂഢമായ ഒറ്റത്തൂണ്‍ കണ്ടെത്തിയത്. ഏകദേശം മൂന്നടി ഉയരമുള്ള ഇത് നിലത്തുറപ്പിച്ചിരിക്കുകയായിരുന്നു. ലോഹം കൊണ്ട് നിര്‍മ്മിച്ചതാണെന്ന് പ്രാഥമിക പരിശോധനയില്‍ വ്യക്തമായി. എന്നാല്‍, ഏത് ലോഹമാണ് ഇതിന്റെ നിര്‍മ്മാണത്തിന് ഉപയോഗിച്ചിരിക്കുന്നതെന്ന് ഇനിയും വ്യക്തമായിട്ടില്ല. ഇതിനു പിന്നാലെ യൂടായില്‍ നിന്ന് തൂണ്‍ അപ്രത്യക്ഷമായി. അതിനു തൊട്ടടുത്ത ദിവസം റൊമാനിയയില്‍ തൂണ്‍ പൊങ്ങി.
പിറ്റേന്ന് യൂടായില്‍ നിന്ന് കാണാതായ നി?ഗൂഢ ലോഹത്തൂണ്‍ കണ്ടെത്തി. ഒരു സംഘം ആളുകള്‍ ചേര്‍ന്ന് നശിപ്പിക്കപ്പെട്ട നിലയിലാണ് ലോഹത്തൂണ്‍ കണ്ടെത്തിയത്. പത്ത് മുതല്‍ പതിനഞ്ച് മിനിറ്റ് വരെയെടുത്താണ് നാല് യുവാക്കള്‍ ചേര്‍ന്ന് ലോഹത്തൂണ്‍ ഇളക്കി മാറ്റിയത്. ഭൂപ്രകൃതിയെ മലിനമാക്കുന്ന വസ്തുവായാണ് ഇവര്‍ ഈ ലോഹത്തൂണിനെ കണ്ടത്. ഇതാണ് തൂണ്‍ ഇവിടെ നിന്ന് നീക്കം ചെയ്യാനുണ്ടായ കാരണം. തൂണ്‍ നീക്കം ചെയ്യുന്നത് കണ്ട മറ്റൊരു വ്യക്തിയാണ് ഇക്കാര്യങ്ങള്‍ അധികൃതരെ അറിയിച്ചത്.
ഇതിന് പിന്നാലെ നിഗൂഢതയേറ്റി റൊമാനിയയിലെ ലോഹത്തൂണ്‍ അപ്രത്യക്ഷമായി. റൊമാനിയയിലെ തൂണ്‍ എവിടെ പോയെന്ന് ഇതുവരെ വ്യക്തമായിട്ടില്ല.പ്രത്യക്ഷപ്പെട്ട് നാലു ദിവസങ്ങള്‍ക്കു ശേഷമാണ് റൊമാനിയയിലെ ബാറ്റ്കാസ് ഡോംനേ എന്ന കുന്നില്‍ നിന്ന് തൂണ്‍ കാണാതായത്. നിലവില്‍ തൂണ്‍ നിന്ന സ്ഥലത്ത് ഒരു കുഴി മാത്രമാണ് ഉള്ളത്. സംഭവത്തില്‍ അന്വേഷണം നടത്തുകയാണെന്ന് ലോക്കല്‍ പൊലീസ് അറിയിച്ചു. യൂടായ്ക്കും റൊമാനിയയ്ക്കും പിന്നാലെ കാലിഫോര്‍ണിയയിലും ലോഹത്തൂണ്‍ പ്രത്യക്ഷപ്പെട്ടു. കാലിഫോര്‍ണിയയിലെ അടാസ്‌കഡേറോ മലയ്ക്ക് മുകളിലാണ് ലോഹത്തൂണ്‍ കണ്ടെത്തിയിരിക്കുന്നത്. സ്റ്റെിന്‍ലെസ് സ്റ്റീല്‍ കൊണ്ടുള്ള ഈ ലോഹത്തൂണിന് 10 അടി നീളവും 18 ഇഞ്ച് വീതിയുമുണ്ട്.
