ഭാര്യയുടെ ഫോണ്‍കോള്‍ വിവരങ്ങള്‍ ഡിറ്റക്റ്റീവ് വഴി ചോര്‍ത്തി; ബോളിവുഡ് നടന്‍ നവാസുദ്ദിന്‍ സിദ്ധിഖിക്കെതിരെ സമന്‍സ്
സ്വകാര്യ ഡിറ്റക്ടീവ് ഏജന്‍സിയെ ഉപയോഗിച്ച് ഭാര്യയുടെ ഫോണ്‍കോള്‍ വിവരങ്ങള്‍ ചോര്‍ത്തിയതിന് ബോളിവുഡ് നടന്‍ നവാസുദ്ദിന്‍ സിദ്ധിഖിക്കെതിരെ ക്രൈം ബ്രാഞ്ച് വീണ്ടും സമന്‍സ് അയക്കും. കേസില്‍ താനെ പൊലീസ് അയച്ച സമന്‍സില്‍ ഹാജരാവാന്‍ താരം അസൗകര്യം അറിയിച്ച സാഹചര്യത്തിലാണ് വീണ്ടും നടപടി സ്വീകരിക്കാന്‍ ക്രൈം ബ്രാഞ്ച് തീരുമാനിച്ചത്.
സംഭവവുമായി ബന്ധപ്പെട്ട് രാജ്യത്തെ പ്രമുഖ വനിതാ ഡിറ്റക്ടീവ് രജനി പണ്ഡിറ്റ് അടക്കം 11 പേരെയാണ് താനെ ക്രൈംബ്രാഞ്ച് ഒരു മാസത്തിനിടെ അറസ്റ്റ് ചെയ്തത്. മാര്‍ച്ച് 9ന് കേസുമായി ബന്ധപ്പെട്ട് താനെ പൊലീസില്‍ മൊഴി നല്‍കണമെന്ന് അറിയിച്ചിരുന്നുവെങ്കിലും, വെളളിയാഴ്ച്ച അദ്ദേഹം ഹാജരായില്ല. തുടര്‍ന്നാണ് ക്രൈംബ്രാഞ്ച് സമന്‍സ് അയക്കുന്നത്. കൂടാതെ അദ്ദേഹത്തിന്റെ അഭിഭാഷകനായ റിസ്വാന്‍ സിദ്ധിഖിയേയും താനെ പൊലീസ് സമന്‍സ് നല്‍കിയിരുന്നു. തുടര്‍ന്ന് അദ്ദേഹം താനെ പൊലീസിന് മൊഴി നല്‍കി.
ജനുവരി 29ന് നടത്തിയ പരിശോധനയില്‍ താനെയില്‍, നിരവധി ഏജന്‍സികളില്‍ പ്രവര്‍ത്തിക്കുന്നവരെയാണ് ഫോണ്‍ സന്ദേശങ്ങളും സംഭാഷണങ്ങളും ചോര്‍ത്തി നല്‍കിയതിന് പൊലീസ് പിടികൂടിയത്. ഇതില്‍ നിന്നാണ് സിദ്ദിഖി അടക്കം നിരവധി പ്രമുഖര്‍ ഫോണ്‍ വിളി ചോര്‍ത്തിയതായി വ്യക്തമായത്.
