ഇന്ത്യക്കാരെ നാണം കെടുത്തി ; ലോകത്തിലെ ഏറ്റവും മോശമായ വിമാനസര്‍വ്വീസുകളില്‍ എയര്‍ ഇന്ത്യക്ക് മൂന്നാം സ്ഥാനം
ന്യൂഡല്‍ഹി : ലോകത്തിനു മുന്‍പില്‍ രാജ്യത്തെ നാണം കെടുത്തി ഇന്ത്യയുടെ സ്വന്തം വിമാന സര്‍വീസ് ആയ എയര്‍ ഇന്ത്യ. ലോകത്തെ ഏറ്റവും മോശം വിമാന കമ്പനികളെ തിരഞ്ഞെടുത്തപ്പോള്‍ എയര്‍ ഇന്ത്യക്ക് മൂന്നാം സ്ഥാനം. ഹംബർഗ് ആസ്ഥാനമായി പ്രവർത്തിക്കുന്ന വിമാനക്കമ്പനി നടത്തിയ പഠനത്തിലാണ് ഇക്കാര്യം വെളിപ്പെട്ടത്. മോശം വിമാന സര്‍വ്വീസുകളില്‍ ഇസ്രായേലില്‍ നിന്നുള്ള ഇലാല്‍ എയര്‍ലൈനിനും ഐസ്ലൻഡ് എയറിനും ശേഷം മൂന്നാംസ്ഥാനത്താണ് എയര്‍ ഇന്ത്യ. ലോകത്ത് ഏറ്റവും മികച്ച വിമാനക്കമ്പനികളില്‍ ഡച്ച് എയര്‍ലൈന്‍ കമ്പനിയായ കെഎല്‍എം ആണ് ഒന്നാം സ്ഥാനത്ത്. സ്‌പെയിനില്‍ നിന്നുളള ഐബീരിയ എയര്‍ലൈന്‍, ജപ്പാന്‍ കമ്പനിയായ ജാല്‍, ഖത്തര്‍ എയര്‍വേവ്‌സ് എന്നിവ യഥാക്രമം രണ്ട്, മൂന്ന്, നാല് സ്ഥാനങ്ങള്‍ കരസ്ഥമാക്കി. സര്‍വ്വീസും കാബിനും പരിഗണിക്കാതെ, കൃത്യനിഷ്ഠ എത്രത്തോളം പാലിക്കുന്നു എന്നതിന്റെ അടിസ്ഥാനത്തിലാണ് ഏറ്റവും മോശം വിമാനക്കമ്പനികളെയും മികച്ചതിനെയും തിരഞ്ഞെടുക്കുന്നത്. ഇത്തരത്തിലുള്ള അറുപത് വിമാനകമ്പനികളുടെ കണക്ക് എടുത്തപ്പോള്‍ 58 സ്ഥാനത്താണ് എയര്‍ ഇന്ത്യ. ഇതാദ്യമായല്ല എയര്‍ ഇന്ത്യക്ക് ഇത്തരത്തില്‍ ഒരു പട്ടം ലഭിക്കുന്നത്.ജര്‍മ്മന്‍ സര്‍വ്വെ പ്രകാരം 2012ലെയും മൂന്നാമത്തെ ഏറ്റവും മോശം എയര്‍ലൈനായി തിരഞ്ഞെടുക്കപ്പെട്ടതും എയര്‍ ഇന്ത്യയായിരുന്നു.