പ്രമുഖ സാഹിത്യകാരന് യു.എ. ഖാദര് അന്തരിച്ചു
പ്രമുഖ സാഹിത്യകാരന് യു.എ. ഖാദര് അന്തരിച്ചു. 85 വയസായിരുന്നു. ശനിയാഴ്ച വൈകിട്ട് ആറ് മണിയോടെ കോഴിക്കോട്ടെ സ്വകാര്യ ആശുപത്രിയിലായിരുന്നു അന്ത്യം. ശ്വാസകോശ അര്ബുദത്തെത്തുടര്ന്ന് ചികിത്സയിലായിരുന്നു. ഏഴ് പതിറ്റാണ്ടോളം നോവലിസ്റ്റും ചെറുകഥാകൃത്തും ചിത്രകാരനുമെല്ലാമായി മലയാള സാഹിത്യത്തില് നിറഞ്ഞുനിന്ന ഖാദറിനെ തേടി, കേരള, കേന്ദ്ര സാഹിത്യ അക്കാദമി പുരസ്കാരങ്ങള് അടക്കം നിരവധി അവാര്ഡുകളെത്തിയിട്ടുണ്ട്.
കേരളീയനായ പിതാവ് മൊയ്തീന് കുട്ടി ഹാജിയുടേയും മ്യാന്മാര് സ്വദേശിനിയായ മാമൈദിയുടേയും മകനായി 1935ല് കിഴക്കന് മ്യാന്മാറിലെ ബില്ലിന് എന്ന ഗ്രാമത്തില് ജനിച്ച അദ്ദേഹം രണ്ടാം ലോകമഹായുദ്ധകാലത്ത് കേരളത്തിലെത്തി. കൊയിലാണ്ടി ഗവ. ഹൈസ്കൂളിലെ പഠനത്തിന് ശേഷം മദ്രാസ് കോളജ് ഓഫ് ആര്ട്സില് ചിത്ര കലാപഠനം നടത്തി. ആകാശവാണി കോഴിക്കോട് നിലയത്തിലും മെഡിക്കല് കോളേജ് ഇന്സ്റ്റിറ്റ്യൂട്ട് ഓഫ് മെറ്റേണല് ആന്ഡ് ചൈല്ഡ് ഹെല്ത്തിലും ഗവ. ജനറല് ആശുപത്രിയിലും ജോലി ചെയ്ത ഖാദര് 1990ലാണ് സര്ക്കാര് സര്വീസില്നിന്ന് വിരമിച്ചത്. ഇംഗ്ലീഷ്, ഹിന്ദി, കന്നട, തമിഴ് ഭാഷകളില് കഥകള് വിവര്ത്തനം ചെയ്തിട്ടുണ്ട്. പുരോഗമനകലാ സാഹിത്യസംഘം മുന് സംസ്ഥാന പ്രസിഡന്റും കേരളസാഹിത്യ അക്കാദമി, കേരള ലളിതകലാ അക്കാദമി എന്നിവയില് അംഗവും സാഹിത്യ പ്രവര്ത്തക സഹകരണസംഘം വൈസ് പ്രസിഡന്റുമായിരുന്നു.
നോവലുകള്, കഥാസമാഹാരങ്ങള്, ലേഖനങ്ങള്, യാത്രാവിവരണം, ബാലസാഹിത്യം എന്നീ വിഭാഗങ്ങളിലായി എഴുപതോളം കൃതികളുടെ കര്ത്താവായ ഖാദറിന്റെ ‘തൃക്കോട്ടൂര് പെരുമ’ മലയാളഭാഷയിലുണ്ടായ ദേശപുരാവൃത്തരചനകളില് പ്രധാനപ്പെട്ടതാണ്. അഘോരശിവം, ഒരുപിടി വറ്റ്, ചങ്ങല, അടിയാധാരം, തൃക്കോട്ടൂര് പെരുമ, കളിമുറ്റം, കഥപോലെ ജീവിതം, കൃഷ്ണമണിയിലെ തീനാളം, ഖാദറിന്റെ പത്തു ലഘു നോവലുകള്, ഖാദറിന്റെ പെണ്ണുങ്ങള് എന്നിവ പ്രധാന കൃതികള്. ഇംഗ്ലീഷ്, ഹിന്ദി, കന്നട, തമിഴ് ഭാഷകളില് കഥകള് വിവര്ത്തനം ചെയ്തിട്ടുണ്ട്. കേരള സാഹിത്യ അക്കാദമി അവാര്ഡ് (രണ്ടു തവണ), അബുദാബി ശക്തി അവാര്ഡ്, എസ് കെ പൊറ്റെക്കാട്ട് അവാര്ഡ്, മലയാറ്റൂര് അവാര്ഡ്, സി എച്ച് മുഹമ്മദ് കോയ സാഹിത്യ അവാര്ഡ് എന്നിവ ലഭിച്ചു.
