ബലിപെരുന്നാള് ചടങ്ങിനിടെ മലേഷ്യയില് പോത്തിന്റെ ആക്രമണം: ഒരാള് മരിച്ചു
പി പി ചെറിയാന്
മലേഷ്യ: ജോഹര് സംസ്ഥാനത്ത് ബലിപെരുന്നാള് (ഈദുല് അദ്ഹ) ചടങ്ങുകള്ക്കിടെ ഉണ്ടായ രണ്ട് വ്യത്യസ്ത പോത്ത് ആക്രമണങ്ങളില് ഒരാള് കൊല്ലപ്പെടുകയും മറ്റൊരാള്ക്ക് ഗുരുതരമായി പരിക്കേല്ക്കുകയും ചെയ്തു.
പോത്തിനെ ബലിനല്കാനായി ശ്രമിക്കുന്നതിനിടെ മൃഗം പെട്ടെന്ന് അക്രമാസക്തനാവുകയും 45 വയസ്സുകാരനെ കുത്തിപ്പരിക്കേല്പ്പിക്കുകയുമായിരുന്നു. കാലിലെ രക്തക്കുഴലുകള്ക്ക് ഗുരുതരമായി പരിക്കേറ്റ ഇദ്ദേഹം ചികിത്സയിലിരിക്കെ ആശുപത്രിയില് വെച്ച് മരണപ്പെട്ടു. മൂന്ന് കുട്ടികളുടെ പിതാവാണ് ഇദ്ദേഹം.
ഇതേ ദിവസം ഉച്ചയ്ക്ക് ശേഷം നടന്ന മറ്റൊരു ആക്രമണത്തില് മറ്റൊരു 45 വയസ്സുകാരന് പോത്തിന്റെ കുത്തേറ്റു. ഇയാളുടെ വാരിയെല്ലിന് ഒടിവു സംഭവിച്ചിട്ടുണ്ട്. നിലവില് അദ്ദേഹം ആശുപത്രിയില് ചികിത്സയിലാണ്.
ബലിപെരുന്നാളിന്റെ ഭാഗമായി വിശ്വാസികള് മൃഗബലി നടത്തുന്നതിനായുള്ള ഒരുക്കങ്ങള്ക്കിടയിലാണ് ഈ രണ്ട് ദാരുണ സംഭവങ്ങളും അരങ്ങേറിയത്.
