വാട്സ്ആപ്പില്‍ പുത്തന്‍ ഫീച്ചര്‍; എന്താണ് ‘റെസ്ട്രിക്റ്റഡ് ചാറ്റ്’ ഫീച്ചര്‍, എങ്ങനെ ഉപയോഗിക്കാം
ന്യൂഡല്‍ഹി: ഉപയോക്താക്കളുടെ സ്വകാര്യത ഇനിയും വര്‍ധിപ്പിക്കുന്നതിന്റെ ഭാഗമായി പുതിയ ‘റെസ്ട്രിക്റ്റഡ് ചാറ്റ്’ (Restricted Chat) ഫീച്ചര്‍ പരീക്ഷിച്ചുതുടങ്ങിയിരിക്കുകയാണ് വാട്സ്ആപ്പ്. ആന്‍ഡ്രോയിഡ്, ഐഫോണ്‍ ബീറ്റാ ഉപയോക്താക്കള്‍ക്കാണ് ഈ ഫീച്ചര്‍ നിലവില്‍ ലഭ്യമായിട്ടുള്ളത്. സുപ്രധാന ആശയവിനിമയങ്ങള്‍ ഒരു തരത്തിലും ചോരില്ലെന്ന് ഉറപ്പാക്കുകയാണ് ഇതിലൂടെ ലക്ഷ്യമിടുന്നത്.
എന്താണ് റെസ്ട്രിക്റ്റഡ് ചാറ്റ്?
വാട്സ്ആപ്പിന്റെ നിലവിലുള്ള ‘അഡ്വാന്‍സ്ഡ് ചാറ്റ് പ്രൈവസി’ (Advanced Chat Privacy) ഫീച്ചറിന്റെ കൂടുതല്‍ നവീകരിച്ച രൂപമാണ് റെസ്ട്രിക്റ്റഡ് ചാറ്റ്. കൂടുതല്‍ വ്യക്തതയുള്ള ഒരു പേര് നല്‍കി ഇതിനെ മാറ്റിസ്ഥാപിച്ചിരിക്കുകയാണ്. മുന്‍കാല ക്രമീകരണം പോലെ, ഇത് പൂര്‍ണ്ണമായും ഓപ്ഷണല്‍ ആണ്, ഡിഫോള്‍ട്ടായി ഓഫ് ചെയ്തിട്ടുണ്ടാകും.
ഒരു ചാറ്റില്‍ റെസ്ട്രിക്റ്റഡ് ചാറ്റ് പ്രവര്‍ത്തനക്ഷമമാക്കിയാല്‍, ആ സംഭാഷണത്തില്‍ നാല് പ്രധാന നിയന്ത്രണങ്ങള്‍ ഏര്‍പ്പെടുത്തും:
1. മീഡിയ ഓട്ടോമാറ്റിക് സേവ് ചെയ്യില്ല: ചാറ്റില്‍ അയക്കുന്ന ചിത്രങ്ങളും വീഡിയോകളും ഫോണിലെ ഗാലറിയില്‍ ഓട്ടോമാറ്റിക്കായി സേവ് ആകില്ല.
2. ചാറ്റ് എക്‌സ്‌പോര്‍ട്ട് ചെയ്യാന്‍ കഴിയില്ല: ആ ചാറ്റ് എക്‌സ്‌പോര്‍ട്ട് ചെയ്യുന്നത് പൂര്‍ണ്ണമായും തടയപ്പെടും.
3. മെറ്റാ എഐ ഫീച്ചറുകള്‍ ലഭ്യമല്ല: ആ പ്രത്യേക സംഭാഷണത്തിനുള്ളില്‍ മെറ്റാ എഐ സവിശേഷതകള്‍ ഉപയോഗിക്കാന്‍ കഴിയില്ല.
4. ലിങ്ക്ഡ് ഡിവൈസുകളില്‍ ലഭ്യമല്ല: കണക്റ്റ് ചെയ്തിട്ടുള്ള മറ്റ് ഡിവൈസുകളില്‍ (Linked devices) ഈ ചാറ്റ് ലഭ്യമാകില്ല. വാട്സ്ആപ്പ് വെബ്, ഡെസ്‌ക്ടോപ്പ് ആപ്പ് അല്ലെങ്കില്‍ മറ്റ് ലിങ്ക് ചെയ്ത ഡിവൈസുകളില്‍ ഇത് കാണാന്‍ സാധിക്കില്ല. അനധികൃത വാട്സ്ആപ്പ് ക്ലയന്റുകളും എഐ ടൂളുകളും ഉപയോഗിച്ച് ചാറ്റ് ആക്‌സസ് ചെയ്യുന്നത് തടയുകയാണ് ഈ നിയന്ത്രണത്തിലൂടെ ലക്ഷ്യമിടുന്നത്.
ഏറ്റവും പുതിയതും പ്രധാനപ്പെട്ടതുമായ നിയന്ത്രണം ലിങ്കഡ് ഡിവൈസസുമായി ബന്ധപ്പെട്ടതാണെന്ന് വിലയിരുത്തപ്പെടുന്നു.
എങ്ങനെ ഉപയോഗിക്കാം?
റെസ്ട്രിക്റ്റഡ് ചാറ്റ് ഫീച്ചര്‍ ഓരോ വ്യക്തിഗത ചാറ്റിനും ഗ്രൂപ്പ് ചാറ്റിനും പ്രത്യേകം പ്രവര്‍ത്തനക്ഷമമാക്കേണ്ടതുണ്ട്. ഗ്രൂപ്പ് ചാറ്റുകളില്‍ ഗ്രൂപ്പ് അഡ്മിന്‍മാര്‍ക്ക് ഇത് ഓണ്‍ ചെയ്യാനും ഓഫ് ചെയ്യാനും കഴിയും. വ്യക്തിഗത ചാറ്റുകളില്‍ ഏത് പങ്കാളിക്കും ഇത് പ്രവര്‍ത്തനക്ഷമമാക്കാം.
ആന്‍ഡ്രോയിഡില്‍ റെസ്ട്രിക്റ്റഡ് ചാറ്റ് ഓണ്‍ ചെയ്യാന്‍:
ആദ്യം നിയന്ത്രിക്കാന്‍ ആഗ്രഹിക്കുന്ന ചാറ്റ് തുറക്കുക
മുകളിലുള്ള കോണ്‍ടാക്റ്റിന്റെ പേരില്‍ ടാപ്പ് ചെയ്യുക
ചാറ്റ് ഇന്‍ഫോ സ്‌ക്രീന്‍ തുറക്കുക
താഴേക്ക് സ്‌ക്രോള്‍ ചെയ്ത് ‘റെസ്ട്രിക്റ്റഡ് ചാറ്റ്’ ഓപ്ഷന്‍ കണ്ടെത്തുക
ആ ഓപ്ഷന്‍ സെലക്ട് ചെയ്ത് ഫീച്ചര്‍ ഓണ്‍ ചെയ്യുക
അഡ്വാന്‍സ്ഡ് ചാറ്റ് പ്രൈവസിയില്‍ നിന്ന് അപ്‌ഗ്രേഡ് ചെയ്യാന്‍:
നിലവില്‍ അഡ്വാന്‍സ്ഡ് ചാറ്റ് പ്രൈവസി ഓണ്‍ ചെയ്തിട്ടുള്ള ചാറ്റുകള്‍ സ്വയമേവ റെസ്ട്രിക്റ്റഡ് ചാറ്റിലേക്ക് അപ്‌ഡേറ്റ് ആകില്ല. ചാറ്റ് തുറന്ന് ‘അഡ്വാന്‍സ്ഡ് ചാറ്റ് പ്രൈവസി’ ടാപ്പ് ചെയ്ത് ‘അപ്‌ഗ്രേഡ്’ > ‘കണ്ടിന്യൂ’ എന്ന ഓപ്ഷന്‍ തിരഞ്ഞെടുക്കണം.
എന്‍ഡ്-ടു-എന്‍ഡ് എന്‍ക്രിപ്ഷന്‍ തുടരും
റെസ്ട്രിക്റ്റഡ് ചാറ്റ് ഓണ്‍ ആയാലും ഓഫ് ആയാലും, എല്ലാ സന്ദേശങ്ങളും കോളുകളും എന്‍ഡ്-ടു-എന്‍ഡ് എന്‍ക്രിപ്ഷന്‍ ഉപയോഗിച്ച് സംരക്ഷിക്കപ്പെടുന്നുണ്ടെന്ന് വാട്സ്ആപ്പ് ഉറപ്പുനല്‍കുന്നു. മെറ്റാ എഐയ്ക്ക് ഉപയോക്താക്കള്‍ അയക്കാന്‍ തിരഞ്ഞെടുക്കുന്ന സന്ദേശങ്ങളില്‍ മാത്രമേ ആക്‌സസ് ഉള്ളൂ എന്നും കമ്പനി വ്യക്തമാക്കുന്നു.
പൊതുജനങ്ങള്‍ക്ക് എപ്പോള്‍ ലഭ്യമാകും?
നിലവില്‍ ആന്‍ഡ്രോയിഡില്‍ വാട്സ്ആപ്പ് ബീറ്റ പതിപ്പ് 2.26.39.11 ലും ഐഒഎസ് 26.39.10.20 പതിപ്പിലും ഈ ഫീച്ചര്‍ ലഭ്യമാണ്. പൊതുജനങ്ങള്‍ക്ക് എപ്പോള്‍ ഈ ഫീച്ചര്‍ ലഭ്യമാകുമെന്നതിനെക്കുറിച്ച് വ്യക്തമായ സൂചനകളൊന്നും വാട്സ്ആപ്പ് നല്‍കിയിട്ടില്ല. ബീറ്റ പ്രോഗ്രാമില്‍ ചേരുന്ന ഉപയോക്താക്കള്‍ക്ക് ഈ ഫീച്ചര്‍ ഇപ്പോള്‍ തന്നെ പരീക്ഷിക്കാം.
സുപ്രധാനമായ ബിസിനസ് അല്ലെങ്കില്‍ വ്യക്തിഗത സംഭാഷണങ്ങള്‍ക്ക് ഉയര്‍ന്ന സുരക്ഷ ഉറപ്പാക്കാന്‍ റെസ്ട്രിക്റ്റഡ് ചാറ്റ് ഫീച്ചര്‍ സഹായകമാകുമെന്നാണ് വിലയിരുത്തപ്പെടുന്നത്.
