വ്യാപാര കരാറില്‍ ഇന്ത്യയ്ക്ക് എതിരാളികളേക്കാള്‍ മുന്‍ഗണനയെന്ന് അമേരിക്കയുടെ ഉറപ്പ്
ഡല്‍ഹി: നിര്‍ദ്ദിഷ്ട ഇന്ത്യ-യുഎസ് വ്യാപാര കരാറിന് കീഴില്‍ മറ്റ് എതിരാളി രാജ്യങ്ങളെ അപേക്ഷിച്ച് ഇന്ത്യയ്ക്ക് താരതമ്യേന കൂടുതല്‍ മുന്‍ഗണന നല്‍കാമെന്ന് അമേരിക്കന്‍ ചര്‍ച്ചാ പ്രതിനിധികള്‍ ഉറപ്പുനല്‍കിയതായി മുതിര്‍ന്ന സര്‍ക്കാര്‍ ഉദ്യോഗസ്ഥന്‍ വെള്ളിയാഴ്ച അറിയിച്ചു. കരാര്‍ ഒപ്പിട്ടതിനു ശേഷം അമേരിക്ക അധിക ഇറക്കുമതി തീരുവകള്‍ ചുമത്തുന്നില്ലെന്ന് ഉറപ്പാക്കുന്നതിനുള്ള വ്യവസ്ഥകള്‍ കരാറിന്റെ നിയമപരമായ കരട് രേഖയില്‍ ഉള്‍പ്പെടുത്തുമെന്നും അദ്ദേഹം വ്യക്തമാക്കി.
വ്യാപാര കരാറിന് അന്തിമരൂപം നല്‍കുന്നതിനായി ഇരുരാജ്യങ്ങളുടെയും പ്രതിനിധികള്‍ ചര്‍ച്ചകള്‍ തുടരുകയാണ്. നവംബര്‍ ആദ്യവാരം നടന്ന അവസാനഘട്ട ചര്‍ച്ചകളില്‍ കസ്റ്റംസ്, വ്യാപാര സുഗമമാക്കല്‍ അധ്യായത്തിലെ നിരവധി ഭാഗങ്ങളില്‍ സമവായമായതായി ഉദ്യോഗസ്ഥന്‍ കൂട്ടിച്ചേര്‍ത്തു. നവംബര്‍ മൂന്നിന് നടന്ന യുഎസ് ഇടക്കാല തിരഞ്ഞെടുപ്പില്‍ ഇറക്കുമതി തീരുവകള്‍, പണപ്പെരുപ്പം, സമ്പദ്വ്യവസ്ഥ എന്നിവ പ്രധാന വിഷയങ്ങളായിരുന്നു.
‘നവംബര്‍ ആദ്യവാരം രണ്ട് ദിവസത്തേക്ക് യുഎസ് പ്രതിനിധികള്‍ ഇവിടെ എത്തിയിരുന്നു. യുഎസ് വ്യാപാര കരാറിന് കീഴില്‍ കസ്റ്റംസ്, വ്യാപാര സുഗമമാക്കല്‍ എന്നിവ സംബന്ധിച്ച് ഒരു അധ്യായമുണ്ട്. ഇതിലെ പല ഭാഗങ്ങളും പരിഹരിക്കപ്പെട്ടു. എതിരാളികളേക്കാള്‍ താരതമ്യേന മികച്ച മുന്‍ഗണന നല്‍കാമെന്ന് യുഎസ് ഉറപ്പുനല്‍കിയിട്ടുണ്ട്. അവരുടെ തീരുവ ഘടന എങ്ങനെയാണ് രൂപപ്പെടുന്നതെന്ന് നമുക്ക് കാത്തിരുന്ന് കാണേണ്ടതുണ്ട്,’ ഉദ്യോഗസ്ഥന്‍ പറഞ്ഞു.
നല്‍കിയ ഉറപ്പുകള്‍ക്ക് വിരുദ്ധമായി ഭാവിയില്‍ ഏതെങ്കിലും തരത്തിലുള്ള അധിക തീരുവ ചുമത്തുകയാണെങ്കില്‍, കരാറിലെ ഇളവുകളില്‍ മാറ്റം വരുത്താന്‍ ഇന്ത്യയ്ക്കും അവകാശമുണ്ടായിരിക്കുമെന്ന് വ്യക്തമാക്കിയിട്ടുണ്ട്. ഉഭയകക്ഷി വ്യാപാര കരാറിന്റെ ആദ്യ ഘട്ടം പൂര്‍ത്തിയാക്കാനുള്ള നടപടികളിലാണ് ഇന്ത്യയും അമേരിക്കയുമെന്നും, ഇതില്‍ സേവന മേഖല ഉള്‍പ്പെടില്ലെന്നും അദ്ദേഹം കൂട്ടിച്ചേര്‍ത്തു.
