വെള്ളിത്തിരയിലെ മായാലോകം: സിനിമ വെറുമൊരു കാഴ്ചയല്ല, അതൊരു അനുഭൂതിയാണ്!
സണ്ണി മാളിയേക്കല്
നിര്മ്മാണ കമ്പനി, കഥ, സംവിധാനം, അഭിനേതാക്കള്, കഥാതന്തു… എല്ലാം കാലേകൂട്ടി പറഞ്ഞിട്ട്, ക്ലൈമാക്സ് മാത്രം പറയാതെ പറഞ്ഞ് നമ്മളെ വെള്ളിത്തിരയിലേക്ക് ആകര്ഷിക്കുന്ന ഒരു മാന്ത്രികവിദ്യയുണ്ട് സിനിമയ്ക്ക്. സാധാരണക്കാരന്റെ ഏറ്റവും വലിയ വിനോദമായ ഈ മായാലോകം കാലഘട്ടത്തിന് മുന്പേ സഞ്ചരിക്കുവാന് തുടങ്ങിയിട്ട് കാലമേറെയായി.
സിനിമ തിയേറ്റര് കഴിഞ്ഞാല് ജീവിതത്തില് നമ്മള് കേള്ക്കുന്ന വേറൊരു തീയറ്റര്, ഞാന് മനസ്സിലാക്കിയിട്ടുള്ളത് ഓപ്പറേഷന് തിയേറ്റര് മാത്രമാണ്. കൗതുകകരമായ കാര്യം എന്തെന്നാല്, ഇവ രണ്ടിന്റെയും പ്രവര്ത്തനരീതിയില് നല്ല സാമ്യമുണ്ട്! മിക്കവാറും കാര്യങ്ങള് കാലേകൂട്ടി പ്രവചിച്ച്, ഫോണ് ഓഫ് ചെയ്ത്, ചുറ്റിനും ഇരിക്കുന്നത് ആരെന്നറിയാതെയാണ് രണ്ടു സ്ഥലത്തും ആളുകള് ഇരിക്കുന്നത്. വലിയ ആരാധനാലയങ്ങളില് പോലും ഉണ്ടാകില്ല സിനിമ തിയേറ്ററിലെ അത്രയധികം നിശബ്ദതയും ശ്രദ്ധയും! ഇവിടെ സിനിമയെ വെറുമൊരു കലാരൂപമായി മാത്രമല്ല, സ്വന്തം ജീവിതം തല്ക്കാലത്തേക്ക് മറന്ന് ആസ്വദിക്കാനുള്ള ഒരു അത്ഭുത മാധ്യമമായിട്ടാണ് ആളുകള് കാണുന്നത്.
സിനിമ എന്ന് പറഞ്ഞാല് അതില് വലിയ തത്ത്വചിന്തകളും കടിച്ചാല് പൊട്ടാത്ത തിയറികളും വേണമെന്നില്ല. ആഴ്ചാവസാനം കയ്യിലൊരു ബക്കറ്റ് പോപ്കോണും പിടിച്ച്, സുഹൃത്തുക്കള്ക്കും കുടുംബത്തിനുമൊപ്പം തിയേറ്ററിലെ ഇരുട്ടിലിരുന്ന് ഒന്നിച്ച് ചിരിക്കാനും കയ്യടിക്കാനും സാധിക്കുന്നതാണ് സിനിമയുടെ യഥാര്ത്ഥ മാന്ത്രികത.
എന്നാല് ഇന്നത്തെ കാലത്ത് ഒരു സിനിമ ഇറങ്ങുമ്പോള് തന്നെ അതിനെ കീറിമുറിച്ച് പരീക്ഷിച്ച്, കുറ്റങ്ങള് മാത്രം കണ്ടുപിടിക്കാന് വലിയൊരു വിഭാഗം ആളുകളുണ്ട് . അമിതമായ ഈ കുറ്റപ്പെടുത്തലുകള് പലപ്പോഴും സിനിമ തരുന്ന ആ വലിയൊരു സന്തോഷത്തെ നശിപ്പിച്ചു കളയാറുണ്ട് എന്നതാണ് വാസ്തവം. എല്ലാ സിനിമയിലും ലോജിക്കും ജീവിത യാഥാര്ത്ഥ്യങ്ങളും തിരയേണ്ടതില്ല. ചിലപ്പോഴൊക്കെ യുക്തിയില്ലാത്ത കോമഡികളും, വായുവില് പറക്കുന്ന ഫൈറ്റുകളും തരുന്ന ആ ഒരു രസം വേറെ തന്നെയാണ്!
ആഴ്ച മുഴുവന് ജോലി ചെയ്ത് മടുത്ത മനസ്സിന്, രണ്ട് മണിക്കൂര് എല്ലാ ടെന്ഷനുകളും മറന്ന് ഇരിക്കാന് സിനിമയേക്കാള് നല്ലൊരു മരുന്ന് വേറെയില്ല.
സുഹൃത്തുക്കള്ക്കൊപ്പം തിയേറ്ററില് ഇരുന്ന് കൂവുന്നതിലും ആര്ത്തുവിളിക്കുന്നതിലും ഒരു പ്രത്യേക രസമുണ്ട്.കുടുംബത്തോടൊപ്പം വൈകാരികമായ രംഗങ്ങള് കണ്ട് ഒന്നിച്ച് കണ്ണുനിറയുന്നതില് ഒരു ഒത്തൊരുമയുണ്ട്.ഈ ഒത്തൊരുമ പ്രേക്ഷകന് നല്കുന്ന പോസിറ്റീവ് എനര്ജി ചെറുതല്ല.
‘ക്രിട്ടിക്കുകളുടെ കണ്ണട മാറ്റിവെച്ച്, ഒരു കൊച്ചുകുട്ടിയുടെ കൗതുകത്തോടെ സ്ക്രീനിലേക്ക് നോക്കൂ… അവിടെ വിരിയുന്ന ഓരോ ഫ്രെയിമും നിങ്ങളെ സന്തോഷിപ്പിക്കും. സിനിമ കാണുന്നത് ആസ്വദിക്കാനാണ്, അതിനെ പഠിക്കാന് മാത്രമല്ല!’
തീയേറ്ററിലെ ലൈറ്റുകള് അണയുമ്പോള് നമ്മള് മറ്റൊരു ലോകത്തേക്ക് മാറുകയാണ്. അവിടെ പാട്ടും ഡാന്സും തമാശകളും ആക്ഷനും നിറഞ്ഞ ഒരു ഉത്സവപ്പറമ്പാണ് കാത്തിരിക്കുന്നത്. ആ മൂഡ് കളയാതെ, ആസ്വദിക്കണമെന്ന നല്ലൊരു മനസ്സ് കൂടെയുണ്ടെങ്കില് എല്ലാ സിനിമയും ഒന്നിനൊന്ന് മെച്ചമായി തോന്നും! തീര്ച്ചയായും, സിനിമ ഒരു വലിയ വിസ്മയം തന്നെയാണ്.
