സലിംകുമാറിന് ഔദ്യോഗിക ബഹുമതികളോടെ വിട
കൊച്ചി: മലയാളികളുടെ പ്രിയനടന് സലിം കുമാറിന് വിട നല്കി കേരളം. വടക്കന് പറവൂരിലെ അദ്ദേഹത്തിന്റെ വസതിയായ ലാഫിങ് വില്ലയില് സംസ്കാര ചടങ്ങുകള് ഔദ്യോഗിക ബഹുമതികളോടെ പൂര്ത്തിയായി. മക്കളായ ചന്തുവും ആരോമലും സലിംകുമാറിന്റെ ചിതയ്ക്ക് തീകൊളുത്തി.
അദ്ദേഹത്തിന്റെ ആഗ്രഹപ്രകാരം മതപരമായ ചടങ്ങുകള് ഒഴിവാക്കിയായിരുന്നു സംസ്കാരം നടന്നത്. അസ്ഥി പുഴയില് ഒഴുക്കുന്നത് അടക്കമുള്ള ചടങ്ങുകള് ഒഴിവാക്കണമെന്ന് അദ്ദേഹം കുടുംബത്തോട് പറഞ്ഞിരുന്നു.
പ്രിയതാരത്തെ അവസാനമായി ഒരുനോക്ക് കാണാന് ഞായറാഴ്ച രാവിലെ മുതല് വന് ജനപ്രവാഹമാണ് പൊതുദര്ശനം നടന്ന പറവൂരിലെ ടൗണ് ഹാളിലേക്ക് ഒഴുകിയെത്തിയത്. കനത്ത മഴയെപ്പോലും അവഗണിച്ച് ആയിരക്കണക്കിന് സാധാരണക്കാരായ ആരാധകരും നാട്ടുകാരും അന്തിമോപചാരം അര്പ്പിക്കാന് എത്തിച്ചേര്ന്നു.
മുഖ്യമന്ത്രി വി.ഡി സതീശന്, പ്രതിപക്ഷ നേതാവ് പിണറായി വിജയന്, നടന് മമ്മൂട്ടി, മോഹന്ലാല് തുടങ്ങി സിനിമ-രാഷ്ട്രീയ രംഗത്തെ പ്രമുഖര് സലിംകുമാറിന് ആദരാഞ്ജലികള് അര്പ്പിച്ചു. സഹോദര തുല്യനായ ഒരാളെയാണ് നഷ്ടപ്പെട്ടതെന്ന് മുഖ്യമന്ത്രി വി.ഡി സതീശന് പറഞ്ഞു. പറവൂരില് എത്തിയ കാലം മുതല് സലിം കുമാറുമായും അദ്ദേഹത്തിന്റെ കുടുംബവുമായും തനിയ്ക്ക് ആത്മബന്ധമുണ്ട്. തിരഞ്ഞെടുപ്പില് മത്സരിക്കുമ്പോള് നോമിനേഷന് കൊടുക്കുന്നത് മുതല് താന് വിജയിച്ചെന്ന് പ്രഖ്യാപിക്കുന്നവരെയുള്ള മുഴുവന് സമയവും സലിം കുമാര് ഒപ്പമുണ്ടാകാറുണ്ടായിരുന്നെന്നും അദ്ദേഹം ഷൂട്ടിം?ഗ് വരെ ക്യാന്സല് ചെയ്താണ് വന്നിട്ടുള്ളതെന്നും മുഖ്യമന്ത്രി പറഞ്ഞു.
സലിംകുമാറിന്റെ വിയോഗത്തോടെ മിമിക്രി വേദികളില് നിന്ന് തുടങ്ങി ദേശിയ ചലച്ചിത്ര പുരസ്കാരം അടക്കം ഒട്ടനേകം ബഹുമതികള് വാരിക്കൂട്ടിയ അസാധാരണ കലാജീവിതത്തിനാണ് ഇതോടെ ഔദ്യോഗികമായി വിരാമമായത്. എന്നാല് അദ്ദേഹം ബാക്കിവെച്ച ചിരിയും കഥാപാത്രങ്ങളും മലയാളികളുടെ മനസ്സില് എന്നും ജീവിക്കും.
