പത്തുകോടി വേണ്ട നഷ്ടപരിഹാരമായി 20 ലക്ഷം മതി എന്ന് മാണി
തിരുവനന്തപുരം : ബിജു രമേശിനെതിരായ മാനനഷ്ടക്കേസില്‍ നഷ്ടപരിഹാരമായി 10 കോടിരൂപ വേണ്ട 20 ലക്ഷം മതിയെന്ന് മുന്‍മന്ത്രി കെ.എം മാണി. ഇതിനെ തുടര്ന്ന് മാനനഷ്ടക്കേസിലെ നഷ്ടപരിഹാരത്തുക കുറക്കണമെന്ന് ആവശ്യപ്പെട്ട് കേരള കോൺഗ്രസ് എം. ചെയർമാൻ കൂടിയായ മാണി കോടതിയില്‍ അപേക്ഷ നല്‍കി. നഷ്ടപരിഹാരമായി 10 കോടിരൂപ വേണ്ടെന്നും 20 ലക്ഷം മതിയെന്നും വ്യക്തമാക്കുന്ന അപേക്ഷ മാണിയുടെ അഭിഭാഷകനാണ് കോടതിയില്‍ സമര്‍പ്പിച്ചത്. കൂടാതെ കോടതി ഫീസായി 15 ലക്ഷംരൂപ കെട്ടിവെക്കുന്നതിൽ ന്ന് ഒഴിവാക്കണമെന്നും അപേക്ഷയില്‍ ആവശ്യപ്പെടുന്നു. ബാര്‍ കോഴക്കേസില്‍ രണ്ടാം തുടരന്വേഷണം വിജിലന്‍സ് തുടങ്ങിയതിന് പിന്നാലെയാണ് മാണിയുടെ നീക്കം. അതേസമയം, ബാര്‍കോഴ കേസിലെ തല്‍സ്ഥിതി റിപ്പോര്‍ട്ട് വിജിലസ് കോടതിയില്‍ സമര്‍പ്പിച്ചു. വിജിലന്‍സ് കൂടുതല്‍ സമയം ചോദിച്ചതിനെ തുടര്ന്ന് കേസ് നവംബര്‍ 30ലേക്ക് മാറ്റിവെച്ചു. ഏഴ് സാക്ഷികളില്‍നിന്ന് മൊഴിയെടുക്കുകയും 21 രേഖകള്‍ ശേഖരിക്കുകയും ചെയ്തുവെന്ന് വിജിലന്‍സ് കോടതിയില്‍ അറിയിച്ചു.